বৃহস্পতিবাৰে (০৮ জুন) এক শোকাৱহ দুৰ্ঘটনাত মহানগৰী গুৱাহাটীৰ ৰাজধানী মছজিদ অঞ্চলত এখন স্কুল বাছে খুন্দা মৰাৰ ফলত একাদশ শ্ৰেণীৰ ছাত্ৰী এগৰাকীয়ে প্ৰাণ হেৰুৱাইছিল।
নিহত ছাত্ৰীগৰাকীক গুৱাহাটীৰ লিটিল ফ্লাৱাৰ স্কুলৰ একাদশ শ্ৰেণীৰ ছাত্ৰী প্ৰিয়া কুমাৰী বুলি চিনাক্ত কৰা হৈছে।
তেওঁৰ ওপৰেৰে যোৱা স্কুল বাছখন ৰয়েল গ্ল’বেল স্কুলৰ আছিল।
ভগ্নীৰ সৈতে স্কুটিৰে গুৱাহাটীৰ হাতীগাঁও অঞ্চলৰ স্কুললৈ গৈ থকা অৱস্থাত দুৰ্ঘটনাটো সংঘটিত হয়।
লগতে পঢ়ক: মৰ্মান্তিক! গণেশগুৰিত ৰয়েল গ্ল’বেলৰ বাছৰ খুন্দাত কৰুণ মৃত্যু একাদশ শ্ৰেণীৰ ছাত্ৰীৰ
দুৰ্ঘটনা সংঘটিত হোৱাৰ পিছত প্ৰায় সকলোৱেই ছোৱালীজনীৰ প্ৰাণ কাঢ়ি লোৱা দুৰ্ঘটনাটোৰ বাবে স্কুল বাছ চালকজনক দোষাৰোপ কৰিবলৈ তৎপৰ হৈ পৰে।
বহুতে দাবী কৰা মতে, AS-01-PC-7411 নম্বৰৰ স্কুল বাছখন পিছফালৰ পৰা ওচৰ চাপি আহি স্কুটাৰখনৰ সৈতে খুন্দা মৰাৰ ফলত দুয়োজন স্কুটাৰ আৰোহী পথত বাগৰি পৰে।
কিন্তু দুৰ্ভাগ্যজনকভাৱে প্ৰিয়া কুমাৰীয়ে প্ৰায় লগে লগে, কোনো ধৰণৰ চিকিৎসা সাহায্য লাভ কৰাৰ আগতেই নিজৰ আঘাতৰ বাবে মৃত্যুবৰণ কৰে।
স্থানীয় লোকে ক্ষোভ প্ৰকাশ কৰি দুৰ্ঘটনাটোৰ কাৰণ বাছখনৰ “দ্ৰুত গতি” বুলি জানিবলৈ দিয়ে।
অৱশ্যে অঞ্চলটোৰ চিচিটিভিৰ ফুটেজে বেলেগ এখন ছবিহে দাঙি ধৰিছে।
এই ফুটেজত বাছখন দুৰ্ঘটনাৰ বাবে দায়ী বুলি কৰা দাবীক দুৰ্বল কৰি তুলিছে।
লগতে পঢ়ক: ৰেগিঙৰ বিৰোধিতা কৰাৰ বাবে গুৱাহাটীৰ বিদ্যালয়ৰ জ্যেষ্ঠ ছাত্ৰৰ দলে প্ৰহাৰ কৰিলে ছাত্ৰৰ পিতৃক!
চিচিটিভিৰ ফুটেজত আচলতে দেখা গৈছে যে দুৰ্ঘটনাটোত জড়িত স্কুল বাছখন পূৰ্বে দাবী কৰা ধৰণে “দ্ৰুত গতি’ত নাছিল।
দৰাচলতে বাছখন যথেষ্ট সাধাৰণ গতিৰে পাৰ হৈ গৈছিল।
স্কুল বাছখনে লেন সলনি কৰা নাছিল আৰু কাষৰ পৰাও স্কুটাৰখনত খুন্দা মৰা নাছিল।
স্কুল বাছখনৰ পিছফালে থকা স্কুটিখনেই বাওঁফালৰ পৰা অভাৰটেক কৰিবলৈ চেষ্টা কৰিছিল। স্কুটাৰখনে বাছখনক অভাৰটেক কৰিবলৈ চেষ্টা কৰি থাকোঁতে ৰাস্তাৰ সন্মুখত চাৰিওফালে মাটিৰে ঠাহ খাই থকা এটা বিশাল গাঁত হঠাতে স্কুটাৰখনৰ সন্মুখত দেখা গ’ল।
লগতে পঢ়ক: বৰ্ণিহাটৰ জলপ্ৰপাতত ডুবি মৃত্যু অসমৰ যুৱকৰ
স্কুটিৰ আৰোহীয়ে গাঁতটোৰ সৈতে মোকাবিলা কৰিবলৈ চেষ্টা কৰিছিল যদিও সেয়া কৰিব নোৱাৰিলে আৰু এই প্ৰক্ৰিয়াত দুচকীয়া বাহনখনৰ ওপৰত নিয়ন্ত্ৰণ হেৰুৱাই পৰি যায়।
ভুক্তভোগী প্ৰিয়া কুমাৰী বাছখনৰ তললৈ সোমাই আহে আৰু বাছখন ওপৰেৰে যোৱাৰ ফলত মৃত্যুক সাৱটি ল’বলগীয়া হয়।
