মানুহৰ মগজুতো ক্ৰমান্বয়ে জমা হৈ পৰিছে মাইক্ৰ’প্লাষ্টিক। ইউনিভাৰ্চিটি অৱ নিউ মেক্সিকো হেল্থৰ বিজ্ঞানীসকলে এই কথা দাবী কৰিছে। গৱেষকসকলে দাবী কৰিছে যে ২০১৬ চনত মানুহৰ মগজুৰ কলাত পোৱা প্লাষ্টিক কণিকাৰ পৰিমাণ ২০২৪ চনত প্ৰায় ৫০ শতাংশ বৃদ্ধি পাইছে, যিটো চিন্তাৰ বিষয়।
গৱেষকসকলে লগতে দাবী কৰিছে যে মগজুত জমা হোৱা প্লাষ্টিকৰ কণাবোৰে স্মৃতিশক্তি হেৰুৱা, এলঝেইমাৰকে ধৰি বিভিন্ন ৰোগৰ সম্ভাৱনা বৃদ্ধি কৰে।
‘নেচাৰ মেডিচিন’ নামৰ আলোচনীখনত প্ৰকাশ পাইছে এই গৱেষণাৰ খবৰ। টক্সিকোলজিষ্ট মেথিউ কেম্পেনে কয় যে এই অধ্যয়নত অংশগ্ৰহণ কৰা বেছিভাগ লোকৰ মগজুত কমেও ৭ গ্ৰাম মাইক্ৰ’প্লাষ্টিক পোৱা গৈছিল। ইয়াৰে কিছুমানৰ শৰীৰত পোৱা গৈছে পেট প্লাষ্টিক, যিটো পানীৰ বটল বনাবলৈ ব্যৱহাৰ কৰা হয়, আন কিছুমানৰ শৰীৰত পোৱা গৈছে খাদ্যৰ পাত্ৰত ব্যৱহাৰ কৰা পলিষ্টাইৰিন। সৰু সৰু প্লাষ্টিকৰ কেৰী বেগ তৈয়াৰ কৰিবলৈ ব্যৱহাৰ কৰা পলিইথাইলিন একাংশ লোকৰ মগজুত পোৱা গৈছে।
কিছুমান মানুহৰ মগজুত দুই-তিনি প্ৰকাৰৰ প্লাষ্টিক কণাও পোৱা গৈছে। ডিমেনচিয়া বা স্মৃতিভ্ৰংশ ৰোগত আক্ৰান্ত এনে ১২ জন প্ৰাপ্তবয়স্কৰ মগজুত পোৱা প্লাষ্টিকৰ কণিকাৰ পৰিমাণ আছিল আচৰিত ধৰণৰ। গৱেষকসকলে কয় যে এই লোকসকলৰ মগজুত জমা হোৱা প্লাষ্টিকৰ পৰিমাণ স্বাভাৱিক লোকৰ মগজুতকৈ প্ৰায় ১০ গুণ বেছি।
যদি মাইক্ৰ’প্লাষ্টিক দেহত প্ৰৱেশ কৰি দিনক দিনে তেজৰ লগত মিহলি হয় তেন্তে ই বিভিন্ন জটিল ৰোগৰ সৃষ্টি কৰিব পাৰে। যেতিয়া প্লাষ্টিক তেজৰ লগত মিহলি হয় তেতিয়া ই ইনচুলিন নিঃসৰণত প্ৰভাৱ পেলায়। যিটো পিছলৈ ডায়েবেটিছৰ কাৰণ হ’ব পাৰে। কেৱল সেয়াই নহয়, প্লাষ্টিকে শৰীৰৰ হৰম’নৰ ভাৰসাম্যও সলনি কৰিব পাৰে। শৰীৰত অত্যধিক প্লাষ্টিকৰ কণা জমা হ’লে পুৰুষৰ শুক্ৰাণুৰ সংখ্যা হ্ৰাস পায়। ই মহিলাৰ বিভিন্ন হৰম’নৰ নিঃসৰণ বন্ধ কৰে আৰু মগজুত জমা হ’লে ই বিভিন্ন স্নায়ুজনিত ৰোগৰ সৃষ্টি কৰিব পাৰে।
