বাসযোগ্যতা হেৰুৱাইছে পৃথিৱীয়ে! ভৱিষ্যতৰ কথা চিন্তা কৰি বিজ্ঞানীসকলে চন্দ্ৰত গঢ়িব স্পাৰ্মবেংক
প্ৰদূষণৰ ফলত পৃথিৱীৰ বাসযোগ্যতা হেৰুৱাইছে।সেয়ে, আপোন এই পৃথিৱী ধ্বংস হোৱাৰ পূৰ্বেই বিকল্প স্থানৰ সন্ধান কৰিছে বিজ্ঞানীসকলে।
পৃথিৱীৰ পৰা মানুহৰ অস্তিত্ব বিলুপ্ত হৈ যোৱাৰ পূৰ্বে পুনৰুজ্জীৱনৰ অন্তিম আশা জীয়াই ৰাখিবলৈ বিজ্ঞানীসকলে ৬৭লাখ প্ৰজাতিৰ ডিম্বানু তথা শুক্ৰাণু চন্দ্ৰত জমা ৰাখিব বিচাৰিছে।
পৃথিৱী ধ্বংস হ’ব পাৰে বিভিন্ন কাৰণত। সেয়া প্ৰাকৃতিক সম্পদৰ বিলুপ্তি, প্ৰাকৃতিক দুৰ্যোগ, মহাজাগতিক কোনো পৰিঘটনা নাইবা ভয়ংকৰ কোনো মহামাৰী যিকোনো কাৰণতে ঘটিব পাৰে।
এনে পৰিস্থিতিত পৃথিৱীৰ প্ৰাণ বৰ্তাই ৰাখিবলৈকো বিজ্ঞানীসকলে এনে উদ্যোগ গ্ৰহণ কৰিছে।
আৰিজোনা বিশ্ববিদ্যালয়ৰ এৰ’স্পেচ তথা মেকানিকেল ইঞ্জিনিয়াৰিঙৰ সহকাৰী অধ্যাপক জেকান থাংগাৰ ধাৰণা এইটো।
য়ুটিউবৰ এটা ভিডিঅ’ত তেওঁ বিষয়টোৰ ব্যাখ্যা দাঙি ধৰিছে। এনেদৰে শুক্ৰানু তথা ডিম্বাণু সংৰক্ষণ ৰখাৰ বিষয়টোক বহুতেই বাইবেলৰ নোৱাৰ নৌকাৰ সৈতে তুলনা কৰিছে। বিজ্ঞানীসকলে ইয়াক ‘মডাৰ্ণ গ্ল’বেল ইন্সিউৰেন্স পলিচি’ বুলি কৈছে।
চন্দ্ৰৰ ১৫০ ডিগ্ৰী চেলছিয়াছত মাটিৰ ভিতৰত স্থাপন কৰা হ’ব এই স্পাৰ্মবেংক। কেবল মানুহৰেই নহয়, বিভিন্ন পশু-পক্ষী তথা প্ৰয়োজনীয় গছ-বিৰিখৰ নমুনা বীজো সংৰক্ষিত কৰা হ’ব।
শেহতীয়াকৈ পৃথিৱীত বৰ্দ্ধিত প্ৰদূষণৰ ফলত জীৱ জগতৰ প্ৰতি প্ৰবল ভাবুকিৰ সৃষ্টি হোৱাৰ সময়তে বিজ্ঞানীসকলে এইদৰে এক চমৎকাৰ বিকল্পৰ কথা চিন্তা কৰাটোৱে বিশেষ চৰ্চা লাভ কৰিছে।