যোৰহাটৰ মিশ্যন হস্পিটেলত কৰ্তব্যৰত এজন নিৰাপত্তাৰক্ষীয়ে চিকিৎসালয়খনৰ এগৰাকী মৃত ৰোগীৰ কাণৰ পৰা কাণফুলি চুৰ কৰা ঘটনাই চাঞ্চল্যৰ সৃষ্টি কৰিছে।
চিকিৎসালয়খনৰ এজন বিষয়াই কয় যে মৃত মহিলাগৰাকীক ২০ ফেব্ৰুৱাৰিৰ নিশা আই চি য়ুত ভৰ্তি কৰা হৈছিল আৰু সেই নিশাই মৃত্যুও হয়।
পৰিয়ালে মৃতদেহটো ঘৰলৈ লৈ যোৱাৰ পিছত দাহ কৰাৰ বাবে প্ৰস্তুত কৰোতে কাণৰ ফুলিযোৰ নথকাটো আৱিষ্কাৰ কৰে।
তাৰ পিছতে বাঘচোং গাওঁখনৰ (মহিলাগৰাকীৰ গাওঁ) কিছু সংখ্যক লোক পৰিয়ালৰ লোকৰ সৈতে চিকিৎসালয়খনলৈ আহে আৰু চিকিৎসালয়ৰ কৰ্মচাৰীয়ে ফুলিযোৰ চুৰ কৰা বুলি অভিযোগ তোলে।
কৰ্তৃপক্ষই CCTV ৰ ফুটেইজ পৰীক্ষা কৰে আৰু আই চি য়ুত কৰ্তব্যৰত ডেভিদ ভৰদ্বাজ নামৰ নিৰাপত্তাৰক্ষীজনে ফুলিযোৰ এৰুৱাই লোৱাটো ধৰা পৰে।
কৰ্তব্যৰ পিছত ঘৰলৈ যোৱা ভৰদ্বাজক মাতি অনা হয়। প্ৰথম অৱস্থাত তেওঁ অস্বীকাৰ কৰিছিল যদিও পিছত সৈ কাঢ়ে। নিৰাপত্তাৰক্ষীজনক আৰক্ষীক গতাই দিয়া হয়।
আনহাতে তেওঁৰ পত্নীয়ে ফুলিযোৰ আনি আৰক্ষীক হাতত চমজাই দিয়ে।
বিষয়াজনে জনোৱামতে, চিকিৎসালয়খনে ত্ৰিশূল ছিকিউৰিটি ছাৰ্ভিছ নামৰ ব্যক্তিগত খণ্ডৰ কোম্পানিৰ পৰা নিৰাপত্তা কৰ্মী লয় আৰু কোম্পানিটোতো এখন অভিযোগ পত্ৰ দিয়া হৈছে।
“এইটোৱে আমাৰ চিকিৎসালয়খনলৈ বদনাম আনিব। এইটো কোম্পানিৰ পৰা ছিকিউৰিটি গাৰ্ড লোৱা হ’ব নে নহয় কমিটীয়ে পৰৱৰ্তী বৈঠকত সিদ্ধান্ত ল’ব”, বিষয়াজনে কয়।
জনপ্ৰিয়ভাৱে মিশ্যন হস্পিটেল হিচাপে খ্যাত খ্ৰীষ্টান মেডিকেল চেণ্টাৰ (Christian Medical Centre) যোৰহাটৰ এখন প্ৰাচীন আৰু প্ৰতিষ্ঠিত তথা সুনাম থকা চিকিৎসালয়। ব্ৰিটিছৰ যুগতে স্থাপন কৰা চিকিৎসালয়খনত শেহতীয়াকৈ এন আৰ এলে ঔদ্যোগিক সামাজিক দায়বদ্ধতাৰ অধীনত এটা অক্সিজেন প্লাণ্টো স্থাপন কৰিছিল।
