দেশৰ আগশাৰীৰ শিক্ষানুষ্ঠান জৱাহৰলাল নেহৰু বিশ্ববিদ্যালয়ত উত্তৰ-পূবৰ শিক্ষাৰ্থীসকলৰ বাবে আছুতীয়া ছাত্ৰাবাসী আৰু ছাত্ৰীনিৱাস নিৰ্মাণৰ বাবে কেন্দ্ৰীয় চৰকাৰে পুঁজি মোকলাই দিছে।
উত্তৰ-পূব পৰিষদ (NEC) আৰু ডনাৰ (DoNER) মন্ত্ৰ্যালয়ৰ বিষয়াসকলৰ সৈতে হোৱা এখন বৈঠকৰ অন্তত উত্তৰ-পূব উন্নয়ন দপ্তৰৰ ৰাজ্যিক মন্ত্ৰী জিতেন্দ্ৰ সিঙে আজি সংবাদ মাধ্যমৰ আগত এই কথা জনায়।
ইতিমধ্যে ১১ কোটি টকা মোকলাই দিয়া এই আঁচনিখনৰ অধীনত ২২৪টা কোঠাৰ এটা চাৰি মহলীয়া হোষ্টেল নিৰ্মাণ কৰা হ’ব। ইয়াৰে ২৪টা কোঠা থাকিব দিব্যাংগ সকলৰ বাবে, সংবাদ মাধ্যমৰ আগত জনালে মন্ত্ৰীজনে।
প্ৰায় ডেৰ একৰ মাটিত স্থাপন কৰিবলৈ লোৱা হোষ্টেলকেইটাত মুঠ ৪২৪জন ছাত্ৰ-ছাত্ৰী থকাৰ ব্যৱস্থা হ’ব।
মন্ত্ৰীজনে জনোৱামতে, বেংগালুৰুত একে ধৰণৰ উদ্দেশ্যে উত্তৰ-পূবৰ শিক্ষাৰ্থীসকলৰ বাবে নিৰ্মিত এটা হোষ্টেল অলপতে প্ৰধান মন্ত্ৰীয়ে উদ্বোধন কৰিছিল।
আনহাতে দিল্লী বিশ্ববিদ্যালয়ৰ অধীনত অধ্যয়নৰত উত্তৰ-পূবৰ ছাত্ৰ-ছাত্ৰীৰ বাবে আছুতীয়া হোষ্টেল নিৰ্মাণৰ আঁচনিও লোৱা হৈছে আৰু ইতিপূৰ্বে ইয়াৰ বাবে ২.৫ কোটি টকা মুকলি কৰি দিয়া হৈছে।
আলোচনাৰ সময়ত নতুন দিল্লীৰ দ্বাৰকাত স্থাপন হ’ব লগীয়া উত্তৰ-পূব সাংস্কৃতিক আৰু তথ্য কেন্দ্ৰৰ বিষয়েও বৈঠকত আলোচনা হয়।
