প্ৰয়োজনীয় পুষ্টিৰ যোগানেৰে শিশুৰ স্বাস্থ্য সুৰক্ষা সুনিশ্চিত কৰাৰ লক্ষ্যৰে যোৱা ১ ছেপ্টেম্বৰৰ পৰা মাহজোৰা কাৰ্যসূচীৰে আৰম্ভ হোৱা ৰাষ্ট্ৰীয় পোষণ মাহ উপলক্ষে ৰাজ্যৰ বিভিন্ন প্ৰান্তত বিভিন্ন কাৰ্যসূচী গ্ৰহণ কৰা হৈছে।
বোকাখাত : ইয়াৰ অংশস্বৰূপে মঙলবাৰে বোকাখাত মহকুমাৰ সমাজ কল্যাণ বিভাগ গোলাঘাটৰ অধীনৰ পশ্চিম গোলাঘাট সংহত শিশু উন্নয়ন প্ৰকল্পৰ সৌজন্যত পুষ্টি ৰেলী উলিওৱা হয়।
ৰাষ্ট্ৰীয় পুষ্টি দিৱসৰ লগত সংগতি ৰাখি উলিওৱা ৰেলীত যোগদান কৰা বোকাখাত মহকুমাৰ সমূহ অংগনৱাড়ী কৰ্মী, সহায়িকা আৰু পৰ্য্যবেক্ষক সকলে সমাজৰ শিশু, কিশোৰ তথা মহিলাসকলক পুষ্টিহীনতাৰ পৰা মুক্ত কৰা, সুস্থ আৰু সৱল কৰি তোলাৰ বাবে শপত বাক্যও পাঠ কৰে।
উল্লেখযোগ্য যে, ৰাষ্ট্ৰীয় পোষণ মাহটোত নৱজাতকৰ প্ৰথম এহেজাৰ দিন, এনিমিয়া, ডায়েৰিয়া, হাত ধোৱা তথা পৰিষ্কাৰ-পৰিচ্ছন্নতা আৰু পুষ্টিকৰ খাদ্য এই পাঁচটা বিশেষ বিষয়ৰ ওপৰত গুৰুত্ব প্ৰদান কৰা হ’ব।
শিৱসাগৰ : ৰাষ্ট্ৰীয় পোষণ মাহ উপলক্ষে মঙলবাৰে শিৱসাগৰ জিলাৰ উপায়ুক্ত কাৰ্য্যালয়ৰ চ্যুকাফা সভাকক্ষত এখন প্ৰস্তুতিমূলক তথা জিলা সমন্বয় সমিতিৰ বৈঠক অনুষ্ঠিত হয়।
জিলা প্ৰশাসন আৰু জিলা সমাজ কল্যাণ বিভাগৰ উদ্যোগত অনুষ্ঠিত এই বৈঠকৰ অধ্যক্ষতা কৰে জিলা উন্নয়ন আয়ুক্ত জোনমণি সোণোৱালে ।
বৈঠকত পোষণ মাহ উপলক্ষে মাহজোৰা জিলা তথা খণ্ড পৰ্যায়ত অনুষ্ঠিত হ’ব লগীয়া বিভিন্ন কাৰ্যসূচীৰ তালিকা চূড়ান্ত কৰা হয়।
জিলা উন্নয়ন আয়ুক্ত গৰাকীয়ে তেওঁৰ বক্তব্যত পোষণ মাহ উদযাপনৰ বিভিন্ন কাৰ্যসূচীয়ে শিশু, কিশোৰী আৰু গৰ্ভৱতী মহিলাৰ সুস্বাস্থ্যৰ বাবে প্রয়োজনীয় পুষ্টি যোগান সম্পৰ্কে সজাগতা বৃদ্ধি কৰিব বুলি আশা প্ৰকাশ কৰে।
তেওঁ সমূহ সংশ্লিষ্ট বিভাগক পোষণ মাহৰ সকলো কাৰ্যসূচী সফলতাৰে সম্পন্ন কৰি এই অভিযানক জন আন্দোলন ৰূপে গঢ়ি তুলিবলৈ আহ্বান জনায়।
বৈঠকত জিলা উন্নয়ন আয়ুক্ত গৰাকীয়ে শিশু, কিশোৰ আৰু মহিলা সকলক অপুষ্টিহীনতাৰ পৰা মুক্ত কৰি সুস্থ আৰু সবল কৰাৰ লক্ষ্যৰে উপস্থিত সকলোকে শপত বাক্য পাঠ কৰোৱায়।
