চলন্ত ৰে’লত ধৰ্ষণ আৰু হত্যাৰ বলি হোৱা শিৱসাগৰৰ ছাত্ৰী ৰাধা কুমাৰীৰ ক্ষুভিত মাতৃ তাৰা দেৱীয়ে দুই অভিযুক্তক ফাঁচীকাঠত ওলমোৱাৰ বাবে শিৱসাগৰ সত্ৰ ন্যায়াধীশৰ আদালতত প্ৰাৰ্থনা জনাইছে।
অসম কঁপাই যোৱা ৰাধা কুমাৰী-ললিমা দেৱীৰ দ্বৈত হত্যাকাণ্ডৰ বৃ্হস্পতিবাৰৰ পৰা আৰম্ভ হোৱা শুনানিত মাতৃগৰাকীয়ে এই প্ৰাৰ্থনা জনাইছে।
“দুইটা নৰপিশাচক ফাঁচী দিব লাগে। কাৰণ এই পাষণ্ড দুটা মানুহৰ শাৰীত নপৰে। আদালতে শীঘ্ৰে এই দুই নৰপিশাচক ফাঁচী কাঠত ওলমাব লাগে,” আদালত চৌহদত সাংবাদিকৰ আগত ক্ষোভেৰে জনালে দেৱীয়ে।
লগতে পঢ়ক– অসমৰ ৰে’লত ছীৰিয়েল কিলাৰ!
আনহাতে ৬ মাহৰ ভিতৰত দোষীয়ে শাস্তি পোৱাৰ সম্ভাৱনা আছে বুলি মন্তব্য কৰিছে চৰকাৰী অধিবক্তা অনিল দত্তই। অধিবক্তাগৰাকীয়ে লগতে জনাই যে ৫৪গৰাকী ব্যক্তিয়ে ঘটনাটোৰ সাক্ষ্য প্ৰদান কৰিব।
লগতে পঢ়ক– শিমলুগুৰিৰ চলন্ত ৰে’লত সংঘটিত হত্যাকাণ্ডৰ চাৰ্জশ্বীট দাখিল আৰক্ষীৰ
১০ জুলাইত শিৱসাগৰৰ শিমলুগুৰি ৰে’ল ষ্টে’চনত সংঘটিত ৰাধা কুমাৰীৰ হত্যাৰ ঘটনাৰ ৭৪ দিনৰ পিছত যোৱা ২৪ ছেপ্টেম্বৰত তদন্তকাৰী ৰে’ল আৰক্ষীয়ে নাজিৰা মহকুমা আদালতত ২০৭ পৃষ্ঠাৰ অভিযোগনামা দাখিল কৰিছিল।
বিচাৰৰ বাবে নাজিৰা মহকুমা আদালতে সকলো তথ্য-পাতি প্ৰেৰণ কৰিছিল জিলা সত্ৰ আদালতলৈ।
দুই অভিযুক্ত বিপিন পাণ্ডে আৰু বিকাশ দাসক বৃ্হস্পতিবাৰৰ শুনানিত কটকটীয়া নিৰাপত্তা বেষ্টনীৰ মাজত আদালতত হাজিৰ কৰোৱা হয়।
