মধ্যপ্ৰদেশৰ অৰণ্যত উদ্ধাৰ হৈছে ৭টাকৈ বন্যহস্তীৰ মৃতদেহ। লগতে সংকটজনক অৱস্থাত উদ্ধাৰ হৈছে আৰু তিনিটা হাতী।
বৰ্তমান আৰু দুটা হাতীৰ শাৰীৰিক অৱস্থা সুস্থিৰ হোৱা বুলি জাবি পৰা গৈছে।
মৃত হাতী কেইটাক মৰণোত্তৰ পৰীক্ষাৰ বাবে প্ৰেৰণ কৰা হৈছে। মৰণোত্তৰ পৰীক্ষাৰ প্ৰতিবেদন আহিলেই এই ঘটনাৰ প্ৰকৃত কাৰণ জানিব পৰা যাব।
প্ৰথম অৱস্থাত বন বিভাগৰ কৰ্মচাৰীয়ে অনুমান কৰিছিল যে বিষক্ৰিয়াৰ ফলত হাতীকেইটাৰ মৃত্যু হ’ব পাৰে।
মঙলবাৰে বিয়লি বন বিভাগৰ কৰ্মচাৰীয়ে প্ৰথমে বান্ধৱগড় বাঘ সংৰক্ষণ প্ৰকল্পৰ মূল খিটাউলি অঞ্চলত দুটা হাতীৰ মৃতদেহ উদ্ধাৰ কৰে। তাৰ পিছত গোটেই উদ্যানখনত অভিযান চলাই বাকী মৃত আৰু অসুস্থ হাতীকেইটা উদ্ধাৰ কৰে।
এই খবৰ পাই পশু চিকিৎসকৰ এটা দল বান্ধৱগড় ৰাষ্ট্ৰীয় উদ্যানত উপস্থিত হয়। স্কুল অৱ ৱাইল্ড লাইফ ফৰেনছিক এণ্ড
হেল্থৰ কৰ্মচাৰীয়েও সেই স্থানত উপস্থিত হয়। ইতিমধ্যে মৃত হাতীকেইটাৰ মৃতদেহ মৰণোত্তৰ পৰীক্ষাৰ বাবে প্ৰেৰণ কৰা হৈছে। বাকী হাতী কেইটা চিকিৎসাধীন হৈ আছে।
এই সন্দৰ্ভত বন বিভাগৰ বিষয়া বিজয় এন আম্বাদে সংবাদ মাধ্যমৰ আগত কয় যে, “প্ৰথম অৱস্থাত দুটা হাতী মৃত অৱস্থাত উদ্ধাৰ হৈছিল, কিন্তু পিছত এই সংখ্যা ৭ টালৈ বৃদ্ধি পালে। তদন্ত অব্যাহত আছে আৰু সমগ্ৰ অঞ্চলটোত তালাচী চলোৱা হৈছে। মৰণোত্তৰ পৰীক্ষাৰ ৰিপৰ্ট পোৱাৰ পিছতহে প্ৰকৃত মৃত্যুৰ কাৰণ জানিব পৰা যাব।”
আনহাতে, বন বিভাগৰ আন এজন কৰ্মচাৰী অজয় ডুবেয়ে কয় যে সম্ভৱতঃ, হাতীৰ জাকটোৱে বনৰ বাহিৰত কিছু খাদ্য খাইছিল। তাৰ পৰা বিষক্ৰিয়া হ’ব পাৰে। তেওঁৰ মতে, খেতিয়কসকলে হয়তো শস্যত কীটনাশকৰ দৰে কিবা ছটিয়াইছিল। সেই কীটনাশক শস্য খাই হাতী এই অৱস্থা হ’ব পাৰে।
উল্লেখ্য যে ২০২১ চনৰ পৰা ২০২৩ চনৰ ভিতৰত বান্ধৱগড় আৰু শ্বাহদোল বনাঞ্চলত ৪৩ টা বাঘৰ মৃত্যু হৈছিল। বেছিভাগ ক্ষেত্ৰতে বন বিষয়াৰ গাফিলতিয়েই বন্য জন্তুৰ মৃত্যুৰ কাৰণ বুলি জানিব পৰা গৈছে।
