শিয়ালদহ অভিমুখী কাঞ্চনজংঘা এক্সপ্ৰেছত মালগাড়ীৰ খুন্দা; মৃত ৫জন, আহত বহু যাত্ৰী

ত্ৰিপুৰাৰ পৰা শিয়ালদহ অভিমুখী কাঞ্চনজংঘা এক্সপ্ৰেছ দুৰ্ঘটনাত পতিত হৈছে। জানিব পৰা মতে, মালগাড়ীৰ খুন্দাত ৰেলখনৰ পিছফালৰ দুটা ডবা ৰেলপথৰ পৰা ছিটিকি যায়। দুৰ্ঘটনাটোত এতিয়ালৈকে ৫ জনৰ মৃত্যুৰ খবৰ পোৱা গৈছে। আহত হৈছে বহু যাত্ৰী। উদ্ধাৰৰ কাম চলি আছে।

শিলিগুৰিত পুৱাৰে পৰা ধাৰাসাৰ বৰষুণ দি আছে। ইফালে এই দুৰ্ঘটনাৰ বাবে উদ্ধাৰ কামো ব্যাহত হৈ আছে। যিটো লাইনত এই দুৰ্ঘটনা সংঘটিত হৈছে সেয়া হৈছে কলকাতাৰ পৰা শিলিগুড়িলৈ যোৱা মূল ৰেল সংযোগী পথ। ফলত দীৰ্ঘ দূৰত্বৰ ৰেল সেৱা সাময়িকভাৱে বন্ধ হৈ পৰিছে।

স্থানীয় সূত্ৰৰ তথ্য অনুসৰি সোমবাৰে পুৱা নিউ জলপাইগুৰি ষ্টেচনৰ পৰা নিৰ্ধাৰিত সময় অনুসৰি ৰাওনা হৈছিল কাঞ্চনজংঘা এক্সপ্ৰেছ। নিচবাৰী আৰু ৰঙাপানী ষ্টেচনৰ মাজত সংঘটিত হয় এই দুৰ্ঘটনা।

খবৰ অনুসৰি পিছফালৰ পৰা এখন মালবাহী ৰেল আহি ৰেলখনত খুন্দা মাৰে। সংঘৰ্ষৰ তীব্ৰতাৰ বাবে কাঞ্চনজংঘা এক্সপ্ৰেছৰ পিছফালৰ ফালৰ পৰা দুটা ডবা ৰেলপথৰ পৰা উফৰি বাগৰি পৰে।

সোমবাৰে পুৱা প্ৰায় ৯:৩০ বজাত সংঘটিত হৈছে দুৰ্ঘটনাটো। প্ৰচণ্ড শব্দ শুনি স্থানীয় ৰাইজ দৌৰি ওলাই আহে। প্ৰথম অৱস্থাত স্থানীয় ৰাইজে উদ্ধাৰ কাম আৰম্ভ কৰে। এই দুৰ্ঘটনাৰ আঁৰত চিগনেলিং চিষ্টেমত গাফিলতি বা অন্য কোনো কাৰণ আছে নেকি তাৰ তদন্ত অব্যাহত ৰাখিছে কৰ্তৃপক্ষই।

আপাততঃ সেই লাইনত দীৰ্ঘ দূৰত্বৰ ৰেলৰ চলাচল সাময়িকভাৱে বন্ধ কৰি দিয়া হৈছে। উত্তৰ বংগৰ সৈতে ৰেলযোগে যোগাযোগ ব্যাহত হোৱাৰ আশংকা কৰা হৈছে।