কেইবাগৰাকীও খাদ্য বিশেষজ্ঞৰ উপস্থিতিত শ্বাহী দৰবাৰৰ উদ্যোগত ‘ব্ল’গাৰ্ছ মীট’ সম্পন্ন
গুৱাহাটী, ১২ আগষ্ট ঃ গুৱাহাটীৰ নতুনকৈ প্ৰতিষ্ঠিত, অথচ জনপ্ৰিয় তথা সম্পূৰ্ণ নিৰামিষ আহাৰৰ প্ৰতিষ্ঠান শ্বাহী দৰবাৰত অলপতে অনুষ্ঠিত হৈ যায় এক মনোগ্ৰাহী লেখক সভা।
খাদ্য সন্দৰ্ভত ধাৰাবাহিকভাৱে ব্ল’গযোগে লেখা-মেলা কৰি অহা চাৰিগৰাকীকৈ খাদ্যৰসিক তথা বিশেষজ্ঞৰ উপস্থিতিত অনুষ্ঠিত হয় এই ব্ল’গাৰ্ছ মীট। খাদ্য প্ৰস্তুতকৰণৰ বাবে সাজু কৰাৰ পৰা আৰম্ভ কৰি খাদ্যগ্ৰহণকাৰীয়ে সেৱাদ লোৱালৈ এই পৰিক্ৰমাটোৰ বিভিন্ন দিশৰ পৰ্যালোচনা কৰা হয় এই বৈঠকত।
খাদ্য পৰিৱেশনৰ পদ্ধতি আৰু তাৰ ফটোগ্ৰাফি খাদ্য সম্বন্ধীয় লেখাত কিমান গুৰুত্বপূৰ্ণ দিশ সেইবোৰো বিস্তৃতভাৱে আলোচনা কৰা হয়। শেহতীয়া খাদ্য ধাৰাটোৰ ওপৰতো সৰস আলোচনা সম্পন্ন হয় বৈঠকত।
উল্লেখযোগ্য যে বিশিষ্ট খাদ্য বিশেষজ্ঞা তথা ৰেষ্টুৰেণ্ট ৰিভিউৱাৰ সংযুক্তা দত্ত, বিশিষ্ট ফুড ৰেচিপি ডেভেলপাৰ তথা স্তম্ভলেখক ড০ গীতা দত্ত, ফুড ব্ল’গাৰ অন্তৰা মহন্ত ৰয় চৌধুৰী আৰু ৰিমঝিম লহকৰে এই বৈঠকত সমল ব্যক্তি হিচাপে অংশগ্ৰহণ কৰে। অনুষ্ঠানৰ আয়োজন তথা পৰিচালনা আছিল স্প’ৰ্টছ ক্ৰাফ্ট মেনেজমেণ্টৰ।
বৈঠকত সমল ব্যক্তি হিচাপে উপস্থিত থাকি সংযুক্তা দত্তই কয়, “আমি এটা কথা কেতিয়াও পাহৰি যাব নালাগে যে নিৰামিষ আহাৰত থকা সৌন্দৰ্য, সুগন্ধি আৰু সোৱাদ, -এই আটাইবোৰেই যিকোনো ধৰণেই, যিকোনো মুহূৰ্ততেই যিকোনো আমিষ আহাৰৰ সৈতে ফেৰ মাৰিব পাৰে। নিসন্দেহে শ্বাহী দৰবাৰৰ এই আয়োজন প্ৰসংশনীয় আৰু ইয়াৰ খাদ্যৰ মানো ভাল।”
মন কৰিব লগীয়া যে গুৱাহাটীৰ ফাঁচি বজাৰস্থিত গণপতি প্লাজাত থকা শ্বাহী দৰবাৰ ৰেষ্টুৰেণ্টখনে আত্মপ্ৰকাশৰ মাত্ৰ পাঁচটা বৰ্ষৰ ভিতৰতেই খাদ্যৰ ক্ষেত্ৰত লাভ কৰিছে চাৰিটাকৈ সন্মানীয় বঁটা। প্ৰথম বৰ্ষতেই শ্ৰেষ্ঠ সম্ভাৱনাপূৰ্ণ প্ৰতিষ্ঠানৰ বঁটা লাভ কৰিবলৈ সক্ষম হৈছিল গুৱাহাটী ফুড এৱাৰ্ডছত। তদুপৰি উক্ত বঁটাৰেই ক্ৰমাগত ৩ বাৰৰ বাবে বৰ্ষশ্ৰেষ্ঠ নিৰামিষ আহাৰৰ ৰেষ্টুৰেণ্টৰ বঁটাও আঁজুৰিবলৈ সক্ষম হৈছিল ৰেষ্টুৰেণ্টখনে।