দেশৰ প্ৰাক্তন মুখ্য ন্যায়াধীশ ৰঞ্জন গগৈয়ে ৰাজ্য সভাৰ মনোনয়ন গ্ৰহণ কৰাৰ পিছতে তেওঁক কটু ভাষাৰে সমালোচনা কৰিছে উচ্চতম ন্যায়ালয়ৰ প্ৰাক্তন ন্যায়াধীশ মাৰ্কেণ্ডেয় কাটজুৱে।
গগৈক সমালোচনাৰ লক্ষ্যৰূপে লৈ প্ৰাক্তন ন্যায়াধীশ কাটজুৱে তেওঁক “নিলাজ, ছেক্সুৱেল পাৰ্ভাৰ্ট” বুলি অভিহিত কৰিছে।
“মই ২০ বছৰ ধৰি অধিবক্তা আছিলো আৰু আন ২০ বছৰৰ বাবে ন্যায়াধীশ আছিলো। মই বহুতো ভাল আৰু বহু বেয়া ন্যায়াধীশক জানো। কিন্তু এই ছেক্সুৱেল পাৰ্ভাৰ্ট ৰঞ্জন গগৈৰ দৰে নিলাজ আৰু মৰ্য্যাদাহানিকৰ ন্যায়াধীশক ভাৰতীয় ন্যায় ব্যৱস্থাত মই কেতিয়াও জনা নাই। এই মানুহজনৰ নথকা ধৰণৰ অনৈতিকতা নায়েই,” কাটজুৰ টুইট।
I have been a lawyer for 20 yrs and a judge for another 20. I hv known many good judges & many bad judges. But I have never known any judge in the Indian judiciary as shameless & disgraceful as this sexual pervert Ranjan Gogoi. There was hardly any vice which was not in this man
— Markandey Katju (@mkatju) March 17, 2020
প্ৰাক্তন মুখ্য ন্যায়াধীশ গগৈক ইয়াৰ পূৰ্বেও প্ৰাক্তন ন্যায়াধীশ কাটজুৱে সমালোচনা কৰিছিল।
কাটজুৰ উপৰি আন কেইবাজনো প্ৰাক্তন ন্যায়াধীশেও প্ৰাক্তন মুখ্য ন্যায়াধীশগৰাকীয়ে ৰাজ্য সভালৈ মনোনয়ন গ্ৰহণ কৰাক লৈ সমালোচনা কৰিছে।
উচ্চতম ন্যায়ালয়ৰ কাৰ্য্যাৱলীক লৈ আয়োজিত অগতানুগতিক সংবাদমেলত প্ৰাক্তন মুখ্য ন্যায়াধীশ গগৈৰ সৈতে উপস্থিত থকা প্ৰাক্তন ন্যায়াধীশ কুৰিয়েন যোছেফেও গগৈক সমালোচনা কৰিছে।
“মোৰ মতে, এজন প্ৰাক্তন মুখ্য ন্যায়াধীশে ৰাজ্য সভাৰ সদস্যৰূপে মনোনয়ন গ্ৰহণ কৰাটোৱে ন্যায়পালিকাৰ স্বতন্ত্ৰতাৰ, যিটো ভাৰতৰ সংবিধানৰ এটা মৌলিক গাঁথনিও, ওপৰত সাধাৰণ লোকৰ বিশ্বাসক নিশ্চয়কৈ কঁপাই তুলিব,” তেওঁ কয়।
২০১৮ চনৰ ১২ জানুৱাৰিত প্ৰাক্তন মুখ্য ন্যায়াধীশ গগৈ আৰু কুৰিয়েনকে ধৰি চাৰিগৰাকী ন্যায়াধীশে আয়োজন কৰা সংবাদমেলৰ প্ৰসংগও প্ৰাক্তন ন্যায়াধীশগৰাকীয়ে উল্লেখ কৰে।
প্ৰাক্তন মুখ্য ন্যায়াধীশ গগৈয়ে ন্যায়পালিকাৰ স্বতন্ত্ৰতা ৰক্ষাৰ বাবে সেই সময়ত সাহস দেখুৱাইছিল বুলি উল্লেখ কৰি যোছেফে কয় যে তেওঁ ন্যায়পালিকাৰ স্বতন্ত্ৰতা আৰু নিৰপেক্ষতাৰ মহৎ নীতিৰ ক্ষেত্ৰত কম্প্ৰমাইজ কৰিলে।
প্ৰাক্তন মুখ্য ন্যায়াধীশ গগৈয়ে ৰাজ্য সভাৰ সদস্যৰূপে শপত গ্ৰহণ কৰাৰ পিছত তেওঁ লোৱা সিদ্ধান্তৰ কাৰণ সংবাদ মাধ্যমক বিস্তাৰিতভাৱে জনাব বুলি মন্তব্য কৰিছে।
প্ৰাক্তন মুখ্য ন্যায়াধীশগৰাকীয়ে কিয় এই সিদ্ধান্ত গ্ৰহণ কৰিলে সেই লৈ সংবাদ মাধ্যমত কিছু বক্তব্য আগবঢ়াইছে।
“মই ইয়াক গ্ৰহণ কৰিছো কাৰণ মোৰ এক দৃঢ় বিশ্বাস আছে যে আইনপালিকা আৰু ন্যায়পালিকাই দেশ নিৰ্মাণৰ বাবে কিছু সময়ত একেলগে কাম কৰিবই লাগিব,” তেওঁ কয়।
ৰাজ্য সভাত তেওঁৰ উপস্থিতি ন্যায়পালিকাৰ দৃষ্টিভংগী আইনপালিকাৰ সন্মুখত প্ৰদৰ্শনৰ এক সুযোগ হ’ব বুলি তেওঁ মন্তব্য কৰে।
দেশৰ মুখ্য ন্যায়াধীশৰ আসনত বহা প্ৰথম অসমীয়াগৰাকীয়ে ২০১৯ চনৰ ১৭ নৱেম্বৰত অৱসৰ গ্ৰহণ কৰিছিল।
