‘মলিউড’ নামেৰে পৰিচিত কেৰালাৰ মালয়ালম চলচ্চিত্ৰ উদ্যোগক কেন্দ্ৰ কৰি আৰম্ভ হোৱা “হেচটেগ মি-টু” (#MeToo) আন্দোলনে তোলপাৰ লগাইছে। চিনেমাৰ শ্বুটিং বা চেটত কেতিয়াবা অভিনেতা, কেতিয়াবা পৰিচালক বা প্ৰযোজকৰ দ্বাৰা তেওঁলোকক কেনেকৈ যৌন নিৰ্যাতন চলোৱা হৈছে, অভিনেত্ৰীসকলে সেয়া উদঙাই দিছে। জানিব পৰা গৈছে যে এতিয়ালৈকে ১৭ গৰাকী অভিনেত্ৰীয়ে এই অভিযোগ প্ৰকাশ কৰিছে।
এনডিটিভিক দিয়া এক সাক্ষাৎকাৰত কেৰালাৰ পৰা নিৰ্বাচিত কংগ্ৰেছৰ সাংসদ শশী থাৰুৰে ভাৰতীয় সমাজৰ সামগ্ৰিক মনোভাৱৰ পৰিৱৰ্তনৰ আহ্বান জনায়। ভাৰতীয় পুৰুষৰ নিশ্চয় সমস্যা আছে বুলি তেওঁ মন্তব্য কৰে। নাৰীৰ ওপৰত হোৱা হিংসাত্মক অপৰাধ নিয়ন্ত্ৰণত যদি কোনো আশা নাথাকে, যদি নিৰ্মূল নহয়, তেন্তে এইটো এক ভয়াৱহ সমস্যা।
সাক্ষাৎকাৰটোত থাৰুৰে মলীউডত যৌন নিৰ্যাতন উদঙাই দিয়াৰ বাবে সমৰ্থন প্ৰকাশ কৰি ব্যৱস্থাগত পৰিৱৰ্তনৰ প্ৰয়োজনীয়তা স্বীকাৰ কৰে। তেওঁ আঙুলিয়াই দিয়ে যে ২০১২ চনত নিৰ্ভয়া ট্ৰেজেডী আৰু ২০২৪ চনত শেহতীয়াকৈ আৰ জি কৰ হাস্পতালত হোৱা ধৰ্ষণ আৰু হত্যাৰ দৰে চৰ্চিত গোচৰৰ মাজতো এই সমস্যাসমূহ মোকাবিলাত পৰ্যাপ্ত অগ্ৰগতি হোৱা নাই। তেওঁ কয়, ‘এক ডজন বছৰতো যেন একো সলনি হোৱা নাই।‘
ইয়াৰ উপৰিও থাৰুৰে সাক্ষাৎকাৰত সংবাদ মাধ্যমত প্ৰকাশ পোৱা যৌন নিৰ্যাতনৰ উদ্বেগজনক হাৰ তুলি ধৰি ইয়াক এক দৈনিক পৰিঘটনা বুলি অভিহিত কৰে। এই খবৰবোৰে বিভিন্ন জনগোষ্ঠীৰ মহিলাৰ ওপৰত নেতিবাচক প্ৰভাৱ পেলায় বুলিও তেওঁ ভাবে।
কেৰালাৰ প্ৰভাৱশালী ৰাজনীতিবিদগৰাকীয়ে ভাৰতত ‘হেচটেগ মি-টু’ (#MeToo) আন্দোলনৰ নেতৃত্ব দিয়া কেৰালাৰ ভূমিকাক প্ৰশংসা কৰে। লগতে চলচ্চিত্ৰ জগতত আবদ্ধ হৈ থকা সমস্যাসমূহ উদঙাই দিয়াৰ ক্ষেত্ৰত ৰাজ্যৰ ভূমিকাকো প্ৰশংসা কৰে। অৱশ্যে তেওঁ কেৰালা চৰকাৰে যৌন নিৰ্যাতনৰ সন্দৰ্ভত ন্যায়াধীশ হেমা সমিতিৰ প্ৰতিবেদন প্ৰকাশ কৰাত পলম কৰাটোক “ক্ষমা কৰিব নোৱাৰা অপৰাধ” বুলি অভিহিত কৰে।
মলীউডৰ আগশাৰীৰ ব্যক্তিত্বৰ বিৰুদ্ধে অভিযোগ উত্থাপন হোৱাৰ সময়তে ইতিমধ্যে মালয়ালম চলচ্চিত্ৰ অভিনেতা সংস্থাৰ সদস্যকে ধৰি কেইবাজনো অভিনেতাই পদত্যাগ কৰিছে। কংগ্ৰেছ সাংসদগৰাকীয়ে অনুভৱ কৰে যে পদত্যাগৰ সিদ্ধান্ত সঠিক যদিও সেয়া যথেষ্ট নহয়। এই ক্ষেত্ৰত তেওঁ যৌন নিৰ্যাতনৰ সুযোগ কৰি দিয়া ব্যৱস্থাটো সলনি কৰাৰ প্ৰয়োজনীয়তাৰ ওপৰত আলোকপাত কৰে। কৰ্মক্ষেত্ৰত মহিলাসকলৰ বাবে শৌচাগাৰ আৰু নিৰাপদ স্থানৰ মৌলিক সুবিধাসমূহৰ ওপৰতো গুৰুত্ব আৰোপ কৰে। মহিলাসকলে নিৰাপদে অভিযোগ দাখিল কৰিব পৰাকৈ এখন স্বতন্ত্ৰ মঞ্চ গঠনৰো আহ্বান জনায় থাৰুৰে।
লগতে পঢ়কঃ চিঙৰা বিক্ৰী কৰা ল’ৰাটোৱে ক্লিয়াৰ কৰিলে NEET UG; ১৮ বছৰীয়া যুৱকৰ সফলতা এতিয়া অনুপ্ৰেৰণা
সংবাদ মাধ্যমৰ বাতৰি মতে, মালয়ালম চলচ্চিত্ৰ জগতত যৌন কেলেংকাৰী সন্দৰ্ভত হেমা কমিটীৰ প্ৰতিবেদন প্ৰকাশ পোৱাৰ পিছত ইটোৰ পিছত সিটো অভিযোগ উত্থাপন হ’বলৈ ধৰিছে। এনে পৰিস্থিতিত এছ’চিয়েচন অৱ মালয়ালম মুভি আৰ্টিষ্ট নামৰ প্ৰভাৱশালী সংস্থাটো ভংগ কৰা হৈছে।
