চেম্পিয়ন ট্ৰফীৰ চেম্পিয়ন হ’ল টিম ইণ্ডিয়া। ফাইনেলত ৰোহিত বাহিনীয়ে নিউজিলেণ্ডক ৪ উইকেটত পৰাস্ত কৰি খিতাপ দখল কৰে। তাৰ পিছত আৰম্ভ হয় ট্ৰফী বিজয়ৰ উদযাপন। ভাৰতীয় অধিনায়ক ৰোহিত শৰ্মাক এই ট্ৰফী প্ৰদান কৰে আই চি চিৰ অধ্যক্ষ জয় শ্বাহে। বিচিচিআইৰ সভাপতি ৰজাৰ বিনিও উপস্থিত থাকে। কিন্তু পাকিস্তান ক্ৰিকেট ব’ৰ্ডৰ কোনো প্ৰতিনিধি তাত নাছিল। অথচ তেওঁলোকেই প্ৰতিযোগিতাৰ আয়োজক।
দৰাচলতে নামতহে আয়োজক। সমগ্ৰ প্ৰতিযোগিতাখনতে তেওঁলোকৰ ভূমিকা বাৰে বাৰে প্ৰশ্নৰ আওতালৈ আহিছে। সেয়া আন্তঃগাঁথনিয়েই হওক বা মেচ আয়োজনেই হওক। নিৰাপত্তাজনিত কাৰণত ভাৰত পাকিস্তানলৈ যোৱা নাছিল। ৰোহিত আৰু তেওঁৰ দলটোৱে ডুবাইত মেচ খেলিছিল। কিন্তু সেইবুলি ট্ৰফী প্ৰদান অনুষ্ঠানত কোনেও উপস্থিত নাথাকিব? যিয়েই নহওক, তেওঁলোক আয়োজক। আনকি ফাইনেলত গেলেৰীতো তেওঁলোকক দেখা যোৱা নাছিল। সেইটো ভাৰতৰ সফলতাত ‘ঈৰ্ষা’ৰ কাৰণেই?
পাকিস্তানৰ প্ৰাক্তন তাৰকা শ্বোৱেইব আখতাৰে প্ৰশ্ন উত্থাপন কৰিছে। ছ’চিয়েল মিডিয়াত প্ৰকাশ কৰা ভিডিঅ’ মেছেজত তেওঁ কয় যে ভাৰতে চেম্পিয়নছ ট্ৰফী লাভ কৰিছে। কিন্তু এটা অদ্ভুত কথা লক্ষ্য কৰিলোঁ, পাকিস্তান ক্ৰিকেট ব’ৰ্ডৰ কোনো ইয়াত নাই। কিন্তু চেম্পিয়নছ ট্ৰফীৰ আয়োজক পাকিস্তান। ট্ৰফী দিবলৈ কোনো নাহিল কিয়? ইয়াত কোনো উপস্থিত নাই কিয়? এইটো চিন্তা কৰা উচিত। এয়া এখন আন্তঃৰাষ্ট্ৰীয় মঞ্চ। ইয়ালৈ আহিব লাগিছিল।”
আন এটা ভিডিঅ’ত তেওঁ ভাৰতৰ প্ৰশংসাও কৰে। তাত তেওঁ কয়, “ভাৰত প্ৰতিযোগিতাখনৰ শ্ৰেষ্ঠ দল। বৰুণে সুন্দৰ বলিং কৰিছে। বিৰাটৰ কামবেক ঘটিছে। আজি ৰোহিতে দুৰ্দান্ত খেলিলে। তেওঁলোকে কেনেকৈ ভাল ক্ৰিকেট খেলিব লাগে আমাক দেখুৱাই দিলে। ভাৰতক অভিনন্দন। তেওঁলোকে এটা যোগ্য দল হিচাপে জয়ী হৈছে।”
