শুক্ৰবাৰে অসম মহিলা বিশ্ববিদ্যালয়ৰ প্ৰেক্ষাগৃহত অসমৰ বিশিষ্ট প্ৰশাসনিক বিষয়া ভাৰতীয় প্ৰশাসনিক সেৱাৰ বিষয়া স্বপ্না দত্ত ডেকাৰ কবিতাৰ আধাৰত নিৰ্মিত চুটি ছবি ’বহুবৃত্ত’ প্ৰদৰ্শন কৰা হয়।
ৰাষ্ট্ৰীয় আৰু আন্তৰাষ্ট্ৰীয় পৰ্যায়ৰ চলচ্চিত্ৰ মহোৎসৱত সমাদৰ লাভ কৰা এই কাব্যধৰ্মী চলচ্চিত্ৰ প্ৰদৰ্শন অনুষ্ঠানত বিশ্ববিদ্যালয়ৰ দুই শতাধিক ছাত্ৰী আৰু বিভিন্ন বিভাগৰ শিক্ষকসকলে অংশগ্ৰহণ কৰে।
প্ৰদৰ্শনী অনুষ্ঠানটিৰ অন্তত ছবিখনিৰ নিৰ্মাণৰ আঁৰৰ অভিজ্ঞতা সন্দৰ্ভত বক্তব্য আগবঢ়াই তেওঁ কয় যে কৰ্মব্যস্ততাৰ সমানে নিজৰ সৃজনীমূলক কামবোৰত মনোনিৱেশ কৰি থাকিলেহে মানুহৰ পেচাগত দিশটোৰ লগতে ৰুচিশীল চিন্তাৰো বিকাশ ঘটে ।
ইয়াৰ লগতে কেৰিয়াৰ গঠনৰ ক্ষেত্ৰত ছাত্ৰীসকলে কেনেদৰে আগবাঢ়িলে সঠিক ফলাফল লাভ কৰাত সহায়ক হয় সেই বিষয়েও এক অনুপ্ৰেৰণাদায়ক প্ৰশ্নোত্তৰ শিতানত ভাগ লয়। উক্ত অনুষ্ঠানটিত বন্তি প্ৰজ্বলন কৰে উপাচাৰ্য ড° অজন্তা বৰগোঁহাই ৰাজকোঁৱৰে। বিশ্ববিদ্যালয়ৰ গণসংযোগ বিভাগৰ সহকাৰী অধ্যাপক অংকন ৰাজকুমাৰে আদৰণি ভাষণ প্ৰদান কৰা অনুষ্ঠানটি আঁত ধৰে ৰাজনীতি বিজ্ঞান বিভাগৰ ছাত্ৰী অনন্যা খনিকৰে।
