১৮ ফেব্ৰুৱাৰীৰ পৰা অনুষ্ঠিত হ’বলগীয়া শিল্পগ্ৰাম মহোৎসৱৰ সম্পৰ্কত আজি গুৱাহাটী পাঞ্জাবাৰীস্থিত শিল্পগ্ৰামত উত্তৰ পূৱ ক্ষেত্ৰ সাংস্কৃতিক কেন্দ্ৰ, শিল্পগ্ৰামৰ ভাৰপ্ৰাপ্ত বিষয়া গুৱাহাটীৰ অলিভাৰ টি পংগেন, গাণনিক বিষয়া থমাছ কছি আৰু শিল্পগ্ৰাম মহোৎসৱৰ মুখ্য সমন্বয়ক নৱ কুমাৰ ভৰালীয়ে সাংবাদিক মেল সম্বোধন কৰে।
সংবাদমেলত জনোৱা মতে, ভাৰত চৰকাৰৰ সাংস্কৃতিক মন্ত্ৰণালয় অধীনৰ উত্তৰ পূৱ ক্ষেত্ৰ সাংস্কৃতিক কেন্দ্ৰ, ডিমাপুৰ হৈছে উত্তৰ পূবাঞ্চলৰ আঠ ভগ্নি ৰাজ্যৰ লোক সংস্কৃতি বিকাশ, সংৰক্ষণ, সংবৰ্ধন, প্ৰসাৰ আৰু উজ্জ্বীৱিত কৰাৰ এক এক চৰকাৰী স্বতন্ত্ৰৰীয় কেন্দ্ৰ।
২০০৬ চনৰ ১৭ জানুৱাৰীত ভাৰত চৰকাৰৰ দ্বাৰা এই কেন্দ্ৰৰ শাখা সাংস্কৃতিক প্ৰকল্প হিচাপে গুৱাহাটীৰ পাঞ্জাবাৰীৰ শিল্পগ্ৰাম প্ৰতিষ্ঠা হয়।
উত্তৰ পূৰ্ৱাঞ্চলৰ অগ্ৰণী সাংস্কৃতিক প্ৰকল্প চৌহদ হিচাপে জনাজাত হোৱা এই শিল্পগ্ৰামৰ প্ৰতিষ্ঠা দিৱস উপলক্ষ্যে প্ৰতিবছৰে অনুষ্ঠিত হৈ আহিছে ৰাষ্ট্ৰীয় পৰ্যায়ৰ সাংস্কৃতিক উৎসৱ-শিল্পগ্ৰাম মহোৎসৱ।
কিন্তু সাম্প্ৰতিক সময়ৰ মহামাৰীৰ প্ৰতি লক্ষ্য ৰাখি এইবাৰ কেৱল সীমিত সংখ্যক শিল্পীৰ অংশগ্ৰহণেৰে এইবাৰৰ শিল্পগ্ৰাম মহোৎসৱ অনুষ্ঠিত হ’ব আজি সংবাদ মেলত সদৰী কৰিছে মহোৎসৱ কৰ্তৃপক্ষই।
উল্লেখ্য যে, উত্তৰ পূৱ ক্ষেত্ৰ সাংস্কৃতিক কেন্দ্ৰ, ডিমাপুৰ উদ্যোগত আয়োজন কৰা ২০২১ বৰ্ষৰ শিল্পগ্ৰাম মহোৎসৱ অহা ১৮ পৰা ২১ ফেব্ৰুৱাৰীৰ লৈ চাৰিদিনীয়াকৈ শিল্পগ্ৰামৰৰ প্ৰাংগনত অনুষ্ঠিত হ’ব। বাৰেৰহনীয়া লোক কলা-শিল্প প্ৰদৰ্শনী আৰু পৰম্পৰাগত জনগোষ্ঠীয় খাদ্যমেলা আৰু বিশেষ আকৰ্ষণ মাটিৰ গোন্ধ থকা লোকসংগীত-নৃত্যৰ অমিয়া সুৰেৰে উৎসৱস্থলী উখল মাখল হ’ব।
উত্তৰ পূৱৰ আঠ ৰাজ্য- অসম, অৰুণাচল প্ৰদেশ, মণিপুৰ, মিজোৰাম, মেঘালয়, নাগালেণ্ড, ছিকিম আৰু ত্ৰিপুৰাৰ বিভিন্ন জনগোষ্ঠীয় লোকনৃত্য আৰু সংগীত শিল্পীৰ উপৰিও অসমৰ কেইবাগৰাকী বিশিষ্ট সংগীত শিল্পীয়ে কেওদিনতে সাংস্কৃতিক অনুষ্ঠান পৰিবেশন কৰিব।
উল্লেখ্য যে, মহোৎসৱৰ লগত সংগতি ৰাখি অসমৰ এটি জনগোষ্ঠীয় লোক নৃত্য প্ৰতিযোগিতাও অনুষ্ঠিত হ’ব। নৱ প্ৰজন্মৰ মাজত লোক শিল্পৰ প্ৰতি আকৰ্ষণ বৃদ্ধি কৰা আৰু প্ৰতিযোগিতামুলক মনোভাৱ পৰিচয় কৰাই দিয়াৰ লক্ষ্যৰে এই প্ৰতিযোগিতাৰ আয়োজন কৰা হৈছে। য’ত সৰ্বমুঠ ১৫ টা অসমৰ বাৰেৰহণীয়া লোক আৰু জনগোষ্ঠীয় নৃত্যৰ দলে অংশগ্ৰহণ কৰিবলৈ এক বাচনি যোগে ইতিমধ্যেই নিৰ্বাচিত হৈছে।
মন কৰিব লগীয়া যে, কাৰ্যসূচী অনুসৰি ১৮ ফেব্ৰুৱাৰিৰ আবেলি ৪.৩০ বজাত শুভাৰম্ভ হ’ব লগা মহোৎসৱৰ উদ্বোধনী অনুষ্ঠানত অসম সাহিত্য সভাৰ সভাপতি ড০ কুলধৰ শইকীয়াই মুখ্য অতিথি হিচাপে উপস্থিত থাকিব।
৮ ৰাজ্যৰ পৰা সৰ্বমুঠ ১৫ জনকৈ লোকনৃত্যৰ শিল্পী, ১০ জনকৈ লোক সংগীত শিল্পীৰ দলসহ সৰ্বমুঠ ২১৬ গৰাকী লোকশিল্পীয়ে মহোৎসৱত প্ৰতক্ষ্যভাৱে অংশগ্ৰহণ কৰিব। মহোৎসৱৰ আটাইকেইদিন শিল্প কলা প্ৰদৰ্শনী আৰু পৰম্পৰাগত খাদ্যমেলা দিনৰ ১১ বজাৰ পৰা আৰু আবেলি ৪ বজাৰ পৰা মুখ্য সাংস্কৃতিক অনুষ্ঠানসমূহ আৰম্ভ হ’ব।
