মুম্বাইলৈ উভতিল সিন্দে, বিধানসভাৰ উপাধ্যক্ষক লগ কৰাৰ সম্ভাৱনা
মহাৰাষ্ট্ৰত চলি থকা ৰাজনৈতিক সংকটৰ মাজতে গুৱাহাটীৰ পৰা মুম্বাইলৈ উৰা মাৰিছে একনাথ সিন্দেই। মুম্বাইত উপস্থিতহোৱাৰ পিছতে তেওঁ বিধানসভাৰ উপাধ্যক্ষক লগ কৰিব বুলি জানিব পৰা গৈছে।
মহাৰাষ্ট্ৰৰ মুখ্যমন্ত্ৰী উদ্ধৱ ঠাকৰেৰ নেতৃত্বত শিৱসেনাই কেইবাজনো বিদ্ৰোহী বিধায়কৰ সদস্যপদ বাতিল কৰাৰ পদক্ষেপ গ্ৰহণ কৰাৰ বিষয়ে জানিব পৰাৰ পিছতে সিন্দেই উপাধ্যক্ষকক সাক্ষাৎ কৰাৰ বাবে তৎপৰ হৈ পৰিছে।
দল বিৰোধী কাৰ্যত লিপ্ত হোৱাৰ অভিযোগত চিন্দে আৰু আন বিধায়কসকলক শিৱসেনাৰ পৰা নিলম্বিত কৰাৰ সম্ভাৱনা থকাৰ পৰিপ্ৰেক্ষিততে সিন্দেই ততাতৈয়াকৈ মুম্বাইলৈ যাত্ৰা কৰা বুলি এটা সূত্ৰই প্ৰকাশ কৰিছে। উল্লেখ্য একনাথ সিন্দেই দলৰ বিৰুদ্ধে বিদ্ৰোহৰ নেতৃত্ব দিছে।
সিন্দেই দাবী কৰিছে যে তেওঁৰ নেতৃত্বত থকা বিধায়কসকলৰ দলটো হৈছে “প্ৰকৃত শিৱসেনা”। সিন্দেক মহাৰাষ্ট্ৰ বিধানসভাত শিৱসেনাৰ মুখ্য সচেতক পদৰ পৰা নিলম্বিত কৰা হৈছে। দলটোৱে অজয় চৌধুৰীক তেওঁৰ ঠাইত নিযুক্তি দিছে।
আনহাতে, বিদ্ৰোহী বিধায়কৰ দলটোৱে সিন্দেক তেওঁলোকৰ নেতা হিচাপে মানি লৈ সুনীল প্ৰভুৰ ঠাইত ভাৰত গোগাৱালেক মুখ্য হুইপ হিচাপে নিযুক্তি দিবলৈ এক প্ৰস্তাৱ গৃহীত কৰিছে।
সুনীল প্ৰভুৱে বিদ্ৰোহী বিধায়কসকললৈ পত্ৰ প্ৰেৰণ কৰি বুধবাৰে সন্ধিয়া মুম্বাইত দলৰ সভাত উপস্থিত থাকিবলৈ অনুৰোধ কৰিছিল। অন্যথা, তেওঁ দলত্যাগ আইনৰ অধীনত তেওঁলোকৰ বিৰুদ্ধে ব্যৱস্থা লোৱাৰ ভাবুকিও দিছিল।