অহা ১৮ জুলাইত অনুষ্ঠিত হ’বলগীয়া ৰাষ্ট্ৰপতি নিৰ্বাচনৰ বাবে শাসকীয় এন ডি এৰ প্ৰক্ষেপিত প্ৰাৰ্থী দ্ৰৌপদী মুৰ্মুৱে আজি মনোনয়ন দাখিল কৰিছে। সংসদ ভৱনত ৰাজ্যসভাৰ মহাসচিবৰ কাৰ্যালয়ত মনোনয়ন দাখিল কৰে মুৰ্মুৱে।
মনোনয়ন দাখিলৰ সময়ত প্ৰাৰ্থী গৰাকীক প্ৰধানমন্ত্ৰী নৰেন্দ্ৰ মোদী, গৃহমন্ত্ৰী অমিত শ্বাহ, প্ৰতিৰক্ষা মন্ত্ৰী ৰাজনাথ সিং, বিজেপি সভাপতি জে পি নড্ডা আৰু বিজেপি শাসিত ৰাজ্যসমূহৰ কেইবাগৰাকীও মুখ্যমন্ত্ৰীয়ে সংগ দিয়ে।
যোৱা ২১ জুনত বিজেপিৰ মুখ্য কাৰ্যালয়ত প্ৰধানমন্ত্ৰী নৰেন্দ্ৰ মোদীৰ সভাপতিত্বত অনুষ্ঠিত দলৰ সংসদীয় কমিটিৰ বৈঠকত দ্ৰৌপদী মুৰ্মুৰ নাম এন ডি এ- ৰ প্ৰাৰ্থী হিচাপে ঘোষণা কৰিছিল।
বৈঠকত ২০ গৰাকী লোকৰ নাম আলোচনা কৰাৰ পিছত সকলোৱে সৰ্বসন্মতিক্ৰমে ঝাৰখণ্ডৰ প্ৰাক্তন ৰাজ্যপাল তথা জনজাতীয় মহিলা নেত্ৰী দ্ৰৌপদী মুৰ্মুক প্ৰাৰ্থী হিচাপে প্ৰক্ষেপ কৰাৰ সিদ্ধান্ত লৈছিল।
এন ডি এ- ৰ পূৰ্বে বিৰোধী দলসমূহে ৰাষ্ট্ৰপতি নিৰ্বাচনত যশোৱন্ত সিনহাক বিৰোধীৰ উমৈহতীয়া প্ৰাৰ্থী হিচাপে ঘোষণা কৰিছিল। প্ৰকাশিত খবৰ অনুসৰি যশোৱন্ত সিনহাই ২৭ জুনত মনোনয়ন দাখিল কৰিব। মনোনয়ন দাখিলৰ অন্তিম তাৰিখ হৈছে ২৯ জুন।
উল্লেখ্য যে অহা ২৪ জুলাইত বৰ্তমানৰ ৰাষ্ট্ৰপতি ৰামনাথ কোবিন্দৰ কাৰ্যকাল অন্ত পৰিব। কোবিন্দৰ পিছত দেশৰ ১৫ সংখ্যক ৰাষ্ট্ৰপতি পদত কোন অধিষ্ঠিত হ’ব, সেই লৈ জল্পনা-কল্পনা চলি থাকিলেও মুৰ্মুৰ সম্ভাৱনীয়তা প্ৰায় চূড়ান্ত বুলি গণ্য কৰা হৈছে।
