মন্ত্ৰী হিমন্ত বিশ্বৰ নৃত্যক লৈ প্ৰতিক্ৰিয়া শিক্ষক কৰ্মচাৰী ঐক্যমঞ্চৰ

যি সময়ত ৰাজ্যৰ ভেন্সাৰ শিক্ষক কৰ্মচাৰীয়ে দৰমহাৰ মুখ নেদেখি জীৱনৰ নিৰাপত্তা হেৰুৱাই পেলাইছে সেই সময়ত ৰাজ্যৰ প্ৰভাৱশালী মন্ত্ৰী হিমন্ত বিশ্ব শৰ্মাই নৃত্যত ব্যস্ত থকা কাৰ্যক তীব্ৰ প্ৰতিক্ৰিয়া প্ৰকাশ কৰিছে অসম শিক্ষক কৰ্মচাৰী ঐক্যমঞ্চই ৷

শুকুৰবাৰে নিৰ্বাচনী প্ৰচাৰৰ সময়ত ভোটাৰক আকৰ্ষণ কৰাৰ উদ্দেশ্যে মন্ত্ৰী গৰাকীয়ে নৃত্য কৰি আনন্দত মতলীয়া হোৱাৰ পিছতে শনিবাৰে প্ৰতিক্ৰিয়া প্ৰকাশ কৰিছে শিক্ষক সংগঠনটোৱে ৷

এক প্ৰেছ বিবৃতিৰ জৰিয়তে ঐক্যমঞ্চৰ কেন্দ্ৰীয় সমিতিৰ কাৰ্যকৰী সভাপতি ছবেদ ভূঞা আৰু সহকাৰী সাধাৰণ সম্পাদক প্ৰাঞ্জল কুমাৰ শৰ্মাই জনায় যে, ভেন্সাৰ শিক্ষানুষ্ঠানৰ শিক্ষক কৰ্মচাৰীৰ বহুতেই খালী হাতে অৱসৰ গ্ৰহণ কৰাৰ লগতে কেইবাজনো শিক্ষক কৰ্মচাৰীয়ে আত্মহনন কৰিবলৈ বাধ্য হৈছে ৷

সেইদৰে, আন একাংশই আৰ্থিক দীনতাৰ বাবে উন্নত চিকিৎসাৰ অভাৱত ইহ সংসাৰৰ পৰা বিদায় লৈছে ৷ একেদৰে গৰিষ্ঠ সংখ্যক শিক্ষক কৰ্মচাৰীয়ে অৱসৰৰ ক্ষণ গণিছে যদিও ভেন্সাৰ শিক্ষক কৰ্মচাৰীৰ সমস্যাৰ প্ৰতি পিঠি দি মন্ত্ৰী হিমন্ত বিশ্ব শৰ্মাৰ নৃত্য দুৰ্ভাগ্যজনক আৰু লজ্জাজনক।

বিবৃতিটোত তেওঁলোকে কয়, বিগত বিধান সভাৰ নিৰ্বাচনত মন্ত্ৰী হিমন্ত বিশ্ব শৰ্মাই ৰাজহুৱা প্ৰতিশ্ৰুতি দিছিল যে বিজেপি নেতৃত্বাধীন চৰকাৰ হ’লে প্ৰথম কেবিনেটতে ভেন্সাৰ শিক্ষানুষ্ঠান প্ৰাদেশিকীকৰণ কৰা হ’ব ৷

কিন্তু প্ৰথম কেবিনেটতো দূৰৈৰ কথা মন্ত্ৰীগৰাকীয়ে প্ৰায় তিনি বছৰতো নিজৰ প্ৰতিশ্ৰুতি পালন কৰিব নোৱাৰিলে বুলি বিবৃতিটোত কোৱা হৈছে ৷