কাইলৈ অনুষ্ঠিত হ’বলগীয়া প্ৰথম পৰ্য্যায়ৰ ভোটগ্ৰহণৰ বাবে সম্পূৰ্ণ সাজু হৈ উঠিছে শিৱসাগৰ জিলা প্ৰশাসন। শিৱসাগৰ পঞ্চায়ত নিৰ্বাচন পৰ্যবেক্ষকদ্বয় ক্ৰমে ভাৰত ভূষণ দেৱ চৌধুৰী আৰু হেমন্ত পেগুৱে আজি শিৱসাগৰ চৰকাৰী উচ্চতৰ মাধ্যমিক বহুমূখী বিদ্যালয়ত আৰু বৰ্ডিং খেল পথাৰত স্থাপন কৰা বিভিন্ন কোষ যেনে ষ্ট্ৰং ৰুম, পৰিবহণ কোষ, নিৰ্বাচনী সামগ্ৰী বিতৰণ কোষ আৰু আহাৰ কক্ষ ইত্যাদি পৰ্যবেক্ষণ কৰে।
ইয়াৰ উপৰি অন্যান্য বিষয়া কৰ্মচাৰীৰ অপ্যায়নৰ বাবে স্থাপন কৰা স্থান, শৌচালয়, পৰিষ্কাৰ পৰিচ্ছন্নতা, চিকিৎসাৰ সা-সুবিধা ইত্যাদিৰ দিশ সমূহৰো পৰ্যবেক্ষক দুগৰাকীয়ে বুজ লোৱা পৰিলক্ষিত হয়।
আনহাতে শিৱসাগৰ জিলা উপায়ুক্ত পল্লৱ গোপাল ঝাই শিৱসাগৰ চৰকাৰী উচ্চতৰ মাধ্যমিক বহুমূখী বিদ্যালয়ত উপস্থিত হৈ পঞ্চায়ত নিৰ্বাচন প্ৰক্ৰিয়াত জড়িত প্ৰতিজন কৰ্মচাৰীক স্বচ্চ, নিকা আৰু নিৰপেক্ষভাৱে পঞ্চায়ত নিৰ্বাচন অনুষ্ঠিত কৰিবৰ বাবে আহ্বান জনায়।
ফটো : নৰ্থ-ইষ্ট নাও
ইয়াৰ উপৰি শিৱসাগৰ আমগুৰি আৰু থাওৰা বিধানসভা সমষ্টিৰ অন্তৰ্গত সকলো ভোট কেন্দ্ৰলৈ প্ৰিজাইডিং, পুলিং বিষয়াসকলৰ লগতে নিৰাপত্তাৰক্ষীসকল ষ্ট্ৰং ৰুমৰ পৰা ইতিমধ্যে বেলেট বাকচ লৈ ৰাওনা হৈছে।
ইপিনে শান্তিপূৰ্ণ ভোটগ্ৰহণ অনুষ্ঠিত কৰাৰ বাবে জিলা প্ৰশাসনে ভোটগ্ৰহণ কেন্দ্ৰসমূহত কটকটীয়া নিৰাপত্তা ব্যৱস্থা গঢ়ি তুলিছে। অতি স্পৰ্শকাতৰ হিচাপে চিনাক্ত হোৱা আমগুৰি সমষ্টিৰ ৩টা ভোটগ্ৰহণ কেন্দ্ৰত অধিক নিৰাপত্তাৰক্ষী মোতায়েন কৰা হৈছে।
