শিৱসাগৰক প্লাষ্টিকমুক্ত কৰিবলৈ পৌৰসভাৰ কঠোৰ পদক্ষেপ
আহোম ৰাজত্ব কালৰ ঐতিহাসিক সমলেৰে ভৰপূৰ শিৱসাগৰ চহৰখনক পৰিস্কাৰ আৰু প্লাষ্টিকমুক্ত কৰি ৰখাৰ উদ্দেশ্যে শিৱসাগৰ পৌৰসভাই কেতবোৰ গুৰুত্বপূৰ্ণ সিদ্ধান্ত লৈছে। সেই অনুসৰি নগৰখনত পলিথিন বেগৰ ব্যৱহাৰ আৰু বিক্ৰী সম্পূৰ্ণ ৰূপে নিষিদ্ধ কৰা হৈছে।
আজি এক প্ৰেছ বিজ্ঞপ্তি যোগে পৌৰসভাৰ কাৰ্যবাহী বিষয়া ৰিতুৰাজ বৰদলৈয়ে এই কথা প্ৰকাশ কৰে।
উল্লেখযোগ্য যে ইতিমধ্যে ভাৰত চৰকাৰৰ প্লাষ্টিক ৱেষ্টেজ মেনেজমেন্ট নীতি ২০১৬ৰ অধীনত শিৱসাগৰত সম্পূৰ্ণৰূপে পলিথিনৰ কেৰিবেগ নিষিদ্ধ কৰা হৈছে। এই ক্ষেত্ৰত শিৱসাগৰ পৌৰসভাই ৰাইজৰ মাজত সজাগতা বৃদ্ধি কৰিবৰ বাবে বিগত দিনসমূহত বিভিন্ন কাৰ্যপন্থা গ্ৰহণ কৰি আহিছে।
আজিৰ নিৰ্দেশনাৰ জৰিয়তে সকলো ব্যৱসায়ী প্ৰতিষ্ঠান, দোকান পোহাৰ তথা ৰাইজক প্লাষ্টিকৰ সামগ্ৰী, পলিথিনৰ কেৰিবেগ বৰ্জন কৰিবলৈ আহ্বান জনোৱাৰ লগতে এই নিৰ্দেশনা অমান্য কৰাসকলকৰ ওপৰত জৰিমনা বিহা, ব্যৱসায়িক প্ৰমাণপত্ৰ বাতিল, বিজুলী যোগান কৰ্তনৰ দৰে শাস্তি বিহা হ’ব বুলি জনোৱা হয়।
পলিথিনৰ কেৰিবেগ ব্যৱহাৰকাৰী পাইকাৰী বিক্ৰেতাক ৫০০০ টকা, খুচুৰা বিক্ৰেতাক ১০০০ টকা আৰু গ্ৰাহকক ৫০০ টকা পৰ্য্যন্ত জৰিমনা বিহা হ’ব বুলি নিৰ্দেশনাত প্ৰকাশ।