সেনা শিবিৰৰ ভিতৰত সতীৰ্থৰ ওপৰত গুলীচালনা কৰাৰ অভিযোগ উত্থাপন হৈছে সেনাবাহিনীৰ এজন মেজৰ পৰ্যায়ৰ বিষয়াই। গুলীচালনাৰ উপৰিও গ্ৰেনেড নিক্ষেপ কৰাৰ অভিযোগো উত্থাপন হৈছে। বৃহস্পতিবাৰে জম্মু-কাশ্মীৰৰ ৰাজৌৰী সেনা শিবিৰত সংঘটিত হয় এই ঘটনা।
সেনাৰ সূত্ৰ অনুসৰি, ইয়াৰ ফলত কমেও ৬ জন আহত হৈছে। সেনা শিবিৰত এই ঘটনাক কেন্দ্ৰ কৰি তীব্ৰ উত্তেজনা বিয়পি পৰিছে। অৱশ্যে এই ঘটনাক লৈ সেনাবাহিনীয়ে মুখ খোলা নাই।
সূত্ৰ অনুসৰি, সেনা শিবিৰত দুয়োপক্ষৰ মাজত তৰ্ক-বিতৰ্ক হয়। ইয়াৰ পিছত মেজৰ ৰেংকৰ বিষয়াজনে এছল্ট ৰাইফলেৰে গুলীচালনা আৰম্ভ কৰে। কেনেবাকৈ বাকী জোৱানবোৰে মেজৰজনক কাবু কৰি কৰায়ত্ত কৰে। এই ঘটনা সংঘটিত হৈছে ভাৰতীয় সেনাৰ ৰাষ্ট্ৰীয় ৰাইফলছৰ ৪৮ নং বেটেলিয়নৰ শিৱিৰত।
এই ঘটনাৰ পিছতে সেনাবাহিনীৰ শীৰ্ষ বিষয়াসকল ততাতৈয়াকৈ সেই স্থানত উপস্থিত হয়। এতিয়া পৰিস্থিতি নিয়ন্ত্ৰণত থকা বুলি কোৱা হৈছে। আহত জোৱানকেইজনক চিকিৎসালয়ত ভৰ্তি কৰোৱা হৈছে। ইয়াৰে এজনৰ অৱস্থা সংকটজনক বুলি কোৱা হৈছে।
