উত্তৰাখণ্ডৰ গুহাত ২৫ দিন ধৰি আত্মগোপন কৰি থকা ছয়জন বিদেশীক উদ্ধাৰ কৰা হৈছে।
উত্তৰাখণ্ডৰ পৌৰি গাৰ্হৱাল জিলাৰ গংগা নদীৰ সমীপৰ গুহাৰ পৰা উক্ত বিদেশী পৰ্যটক কেইজনক উদ্ধাৰ কৰা হৈছে।
উক্ত ছয় বিদেশী পৰ্যটকৰ মাজত দুগৰাকী মহিলাও আছে।
ইতিমধ্যে তেওঁলোকৰ স্বাস্থ্য পৰীক্ষা সম্পন্ন কৰা হৈছে আৰু বৰ্তমান তেওঁলোকৰ শৰীৰত ক’ৰ’না ভাইৰাছৰ লক্ষণ নাই বুলি স্বাস্থ্য বিভাগে জানিবলৈ দিছে।
লক্ষ্মী মনঝুলা আৰক্ষীৰ মতে, যোৱা শুকুৰবাৰে গাৰুণ অঞ্চলৰ গংগা নদীৰ সমীপৰ গুহাত কেইজনমান বিদেশী লোক থকাৰ খবৰ লাভ কৰে।
ইয়াৰে পিছতে স্থানীয় আৰক্ষীয়ে চোৰাংচোৱাৰ এটা গোটৰ সৈতে গৈ বিদেশী পৰ্যটক কেইগৰাকীক উদ্ধাৰ কৰে।
‘ছয় বিদেশী নাগৰিকক ভিন ভিন গুহাৰ পৰা আমি উদ্ধাৰ কৰো। তেওঁলোকে যোৱা ২৪ মাৰ্চৰ পৰা তাতে থকাৰ কথা জনাইছে। তাৰ পূৰ্বে তেওঁলোকে হোটেলত আছিল। পইচাৰ নাটনি হোৱাত হোলেটৰ পৰা উলাই আহি গুহাত থাকিবলৈ লয়।’ লক্ষ্মী মঞ্জুলা আৰক্ষী থানাৰ বিষয়া ৰাকেন্দ্ৰ সিঙে সংবাদ মাধ্যমৰ আগত এইদৰে কয়।
বিদেশী নাগৰিক কেইজনে ওচৰৰ বজাৰ পৰা খাদ্য সামগ্ৰী সংগ্ৰহ কৰি গুহাৰ ভিতৰতে খাদ্য প্ৰস্তুত কৰি গ্ৰহণ কৰিছিল।
উক্ত ছয় বিদেশীৰ মাজৰ দুজন ইউক্ৰেইন, এজনকৈ টুৰ্কী, আমেৰিকা, ফ্ৰান্স আৰু নেপালৰ নাগৰিক আছে জানিব পৰা গৈছে।
স্বাস্থ্য পৰীক্ষাৰ পিছত বিদেশী নাগিৰককেইজনক ৰামঝুলা লক্ষ্মী নাৰায়ণ মন্দিৰ স্বৰগ্ৰাম ন্যাসত কোৱাৰান্টেইনত ৰখা হৈছে।
