বিদ্ৰোহী সংগঠন কমতাপুৰ লিবাৰেচন অৰ্গেনাইজেচন, চমুকৈ কেএলঅ’ৰ সৈতে কোকৰাঝাৰ জিলাত এক সংঘৰ্ষত লিপ্ত হয় অসম আৰক্ষী। এই সংঘৰ্ষত বিদ্ৰোহী সংগঠনটোৰ দুগৰাকী সদস্য আহত হয় বুলি জানিব পৰা গৈছে।
গুৰুতৰভাৱে আহত দুই সদস্যসহ মুঠ ছয়গৰাকী সদস্যক গ্ৰেপ্তাৰ কৰিছে অসম আৰক্ষীয়ে। আনহাতে সংঘৰ্ষস্থলীৰ পৰা আন দুগৰাকী সদস্য পলাই যাবলৈ সক্ষম হয় বুলি এগৰাকী আৰক্ষী বিষয়াই জানিবলৈ দিয়ে।
আৰক্ষী বিষয়া প্ৰশান্ত কুমাৰ ভূঞাই জানিবলৈ দিয়া মতে, দেওবাৰে সন্ধিয়া চক্ৰশিলা অঞ্চলত এক অভিযান আৰম্ভ কৰিছিল আৰক্ষীয়ে। এই অভিযানতে আজি কেএলঅ’ৰ এটা ট্ৰেঞ্জিট কেম্প উদ্ঘাটন কৰা হয়।
অভিযানকালত ছয়গৰাকী সদস্যক গ্ৰেপ্তাৰ কৰা হয় আৰু ইয়াৰে দুগৰাকী সদস্য এনকাউণ্টাৰৰ সময়ত আৰক্ষীৰ গুলীত আঘাতপ্ৰাপ্ত হৈছিল বুলি তেওঁ লগতে উল্লেখ কৰে।
ভূঞাই লগতে উল্লেখ কৰা মতে শিবিৰত মুঠ আঠগৰাকী বিদ্ৰোহী সদস্য আছিল আৰু তেওঁলোকৰে দুগৰাকী পলায়ন কৰিবলৈ সক্ষম হয়। শিবিৰৰ পৰা দুটা ৰিভলভাৰ আৰু খাদ্য সামগ্ৰী উদ্ধাৰ কৰা হৈছে বুলি তেওঁ লগতে কয়।
পলাতক বিদ্ৰোহী সদস্য দুগৰাকীৰ সন্ধানত অভিযান অব্যাহত ৰখা হৈছে বুলি আৰক্ষী বিষয়া প্ৰশান্ত কুমাৰ ভূঞাই লগতে সদৰী কৰিছে।
