পুনৰ শিশু, যুৱতী আৰু মহিলাৰ বাবে অসুৰক্ষিত হিচাপে প্ৰমাণ হৈছে গুৱাহাটী মহানগৰী। এটাৰ পাছত আন এট অপৰাধ সংঘটিত হোৱাৰ পাছতো অপৰাধ নিয়ন্ত্ৰণ কৰাত ব্যর্থ হৈছে স্মাৰ্ট চিটি পুলিচ।শেহতীয়াকৈ গুৱাহাটী মহানগৰীৰ সাতগাঁও থানাৰ অন্তৰ্গত বতাহঘুলি অঞ্চলৰ পৰা এগৰাকী ১৩ বছৰীয়া কিশোৰীক অপহৰণ কৰি উপর্যুপৰি ধৰ্ষণৰ অভিযোগত আৰক্ষীৰ জালত পৰিছে এজন যুৱক৷
ভুক্তভোগীৰ পৰিয়ালে সাতগাঁও থানাত নিৰুদ্দিষ্ট হোৱা সম্পর্কে দিয়া এজাহাৰৰ ভিত্তিত আৰক্ষীয়ে বতাহঘুলিৰ পৰা গ্ৰেপ্তাৰ কৰে জিন্টু মনি দাস (২০) নামৰ এজন যুৱকক। জানিব পৰা মতে যোৱা ১২ মে’ৰ দিনা একে অঞ্চলৰে জিন্টুমনি দাস নামৰ যুৱকজনে সপ্তম শ্ৰেণীত অধ্যয়নৰত ছাত্ৰী গৰাকীক প্ৰথমতে কাপোৰ কিনি দিয়াৰ প্রলোভনৰে অপহৰণ কৰি ভঙাঘৰ অঞ্চলত থকা এজন যুৱকৰ হাতত গতাই দিয়ে। তাৰ পাছৰ পৰাই নিৰুদ্দিষ্ট হৈ আছে কিশোৰীগৰাকী। ইফালে উক্ত ঘটনাৰ দুদিন পাছতো নিৰুদ্দিষ্ট ছাত্ৰীগৰাকীৰ কোনো সন্ধান নোপোৱাত উদ্বিগ্ন হৈ পৰা পৰিয়াল বর্গই ঘটনা সন্দর্ভত সাতগাঁও আৰক্ষীৰ কাষ চাপে আৰু এজাহাৰ দাখিল কৰে।
এই এজাহাৰৰ ভিত্তিত সাতগাঁও আৰক্ষীয়ে তদন্ত প্রক্রিয়া অব্যাহত ৰাখি কালি বতাহঘুলিৰ পৰা জিন্টু মনি দাসক গ্ৰেপ্তাৰ কৰাৰ পাছত জিন্টু মনি দাসৰ স্বীকাৰোক্তিৰ ভিত্তিত আজি ভঙাঘৰ অঞ্চলৰ পৰা ছাত্রী গৰাকীক উদ্ধাৰ কৰে। অৱশ্যে এই অপহৰণ কাণ্ডৰ লগত জড়িত পলাতক আনজন যুৱকক এই পর্যন্ত গ্ৰেপ্তাৰ কৰিবলৈ আৰক্ষী সক্ষম হোৱা নাই। জানিব পৰা মতে কিশোৰী গৰাকীৰ সৈতে পলাতক যুৱক গৰাকীৰ আছে প্ৰেমৰ সম্পর্কে।কালি কিশোৰী গৰাকীৰ স্বাস্থ্য পৰীক্ষা কৰোৱাৰ পাছত পৰিয়ালক গতাই দিয়ে। ঘটনা সন্দর্ভত সাতগাওঁ আৰক্ষীয়ে ৩৬৫ নং অপহৰণ ধাৰাৰ অধীনত আৰু পকছ’ আইনৰ অধীনত এটা গোচৰ ৰুজু কৰিছে। বিগত ছয় দিন ধৰি কিশোৰী গৰাকীক উপর্যুপৰি বলাৎকাৰ কৰি আছিল বুলি পৰিয়ালে অভিযোগ উত্থাপন কৰে।
