মধ্যাহ্ন ভোজনৰ খাদ্যত ওলাল সাপ! আহাৰ গ্ৰহণ কৰি চিকিৎসাধীন হ’ল ছাত্ৰ-ছাত্ৰী
বিদ্যালয়ত শিক্ষাৰ্থীক খাবলৈ দিয়া মধ্যাহ্ন ভোজনৰ খাদ্যত ওলাইছে সাপ আৰু এই খাদ্য গ্ৰহণ কৰি ৰুগীয়া হৈ পৰা একাধিক ছাত্ৰ-ছাত্ৰী ভৰ্তি হ’বলগীয়া হৈছে চিকিৎসালয়ত। ছাত্ৰ-ছাত্ৰীৰ জীৱনক লৈ হেতালি খেলা এই আজৱ কাণ্ড সংঘটিত হৈছে পশ্চিম বংগত।
পশ্চিম বংগৰ বীৰভূম জিলাৰ ময়ুৰেশ্বৰ ব্লকৰ এখন প্ৰাথমিক বিদ্যালয়ৰ প্ৰায় ৩০ গৰাকী ছাত্ৰ-ছাত্ৰীয়ে সোমবাৰে মধ্যাহ্ন ভোজনত পৰিবেশন কৰা খাদ্য গ্ৰহণ কৰি অসুস্থ হৈ পৰে বুলি জানিব পৰা গৈছে।
শিক্ষাৰ্থীসকলে খাদ্য খোৱাৰ পাছতে বমি কৰিবলৈ আৰম্ভ কৰাৰ বাবে শংকিত হৈ পৰে বিদ্যালয় কৰ্তৃপক্ষ আৰু ততাতৈয়াকৈ অসুস্থ শিক্ষাৰ্থীসকলক ৰামপুৰহাট চিকিৎসা মহাবিদ্যালয়লৈ লৈ যোৱা হয়।
ইফালে বিদ্যালয়ত খাদ্য প্ৰস্তুত কৰা এগৰাকী কৰ্মচাৰীৰ দাবী অনুসৰি দাইল ভৰ্তি এটা পাত্ৰত পোৱা গৈছিল সাপ। এই কাৰণতে শিক্ষাৰ্থীসকল হঠাতে অসুস্থ হৈ পৰা বুলি প্ৰায় নিশ্চিত বুলি মন্তব্য কৰে কৰ্মচাৰীগৰাকীয়ে।
ইফালে ঘটনা সন্দৰ্ভত ব্লক উন্নয়ন বিষয়া গৰাকীয়ে সাংবাদিকৰ আগত দিয়া ভাষ্য মতে মধ্যাহ্ন ভোজন খোৱাৰ পিছতে শিক্ষাৰ্থীসকল অসুস্থ হৈ পৰাৰ অভিযোগ গাঁৱৰ কমধ্যগৰাকীও লোকৰ পৰা পোৱা গৈছে।
ঘটনাৰ তদন্তৰ বাবে প্ৰাথমিক বিদ্যালয়ৰ জিলা পৰিদৰ্শকে ১০ জানুৱাৰীত বিদ্যালয়খন ভ্ৰমণ কৰিব বুলি তেওঁ উল্লেখ কৰে। তেওঁ লগতে এগৰাকী শিক্ষাৰ্থীৰ বাদে সকলোকে চিকিৎসালয়ৰ পৰা মুকলি কৰি দিয়া হৈছে বুলি সদৰী কৰে।
ইফালে এই ঘটনা পোহৰলৈ অহাৰ পাছতে ক্ষোভিত অভিভাৱকসকলে বিদ্যালয়খনৰ প্ৰধান শিক্ষকক ঘেৰাও কৰি তেওঁৰ দুচকীয়া বাহনখন ক্ষতিগ্ৰস্ত কৰে বুলি এগৰাকী আৰক্ষী বিষয়াই জানিবলৈ দিছে।