লখিমপুৰ জিলাৰ আৰক্ষী অধীক্ষক হিচাপে দায়িত্ব গ্ৰহণ কৰাৰ পিছতেই ড্ৰাগছ, নকল সোণ আৰু আন সকলো অপৰাধৰ বিৰুদ্ধে সৰৱ হৈ পৰিছে আই পি এছ আনন্দ মিশ্ৰ। দায়িত্বভাৰ গ্ৰহণ কৰিয়েই অপৰাধীৰ বিৰিদ্ধে অভিযানত নামিছে বিষয়াগৰাকী।
মিশ্ৰই লখিমপুৰত প্ৰথমটো অভিযান চলাই মঙলবাৰে ভুৱা সোণ সৰবৰাহৰ সৈতে জড়িত তিনিজন দুষ্কৃতিকাৰীক গ্ৰেপ্তাৰ কৰিছে।
আৰক্ষী অধীক্ষক আনন্দ মিশ্ৰৰ নেতৃত্বত আৰক্ষীৰ এটা দলে বালিকাটা আৰু হৰিপুৰত অভিযান চলাই তিনিওটা সৰবৰাহকাৰীক গ্ৰেপ্তাৰ কৰে।
সূত্ৰৰ পৰা জানিব পৰা মতে, গ্ৰেপ্তাৰ হোৱা অভিযুক্ত কেইগৰাকীৰ নাম ছাদ্দাম হুছেইন, ছাৰিফুল ইছলাম আৰু গুলজাৰ হুছেইন।
কেইবাদিনো ধৰি ৰাজ্যত ভুৱা সোণ সৰবৰাহৰ অবৈধ ব্যৱসায়ত জড়িত হৈ আছিল অভিযুক্তসকল।
উল্লেখ্য, সোমবাৰে আনন্দ মিশ্ৰই ৬০০০৮১৫৭৯৯ নম্বৰৰ এটা হেল্পলাইন নম্বৰ প্ৰদান কৰিছে। এই নম্বৰৰ যোগেদি যিকোনো লোকে অপৰাধমূলক কাৰ্যকলাপৰ বিষয়ে আৰক্ষীক অৱগত কৰিব পাৰিব।
আৰক্ষীক অপৰাধৰ বিষয়ে খবৰ দিয়া ব্যক্তিসকলে নিজৰ পৰিচয় গোপনে ৰাখিব পাৰিব।
বিশেষকৈ জাল নোট আৰু ভুৱা সোণকে ধৰি সকলো ধৰণৰ অসামাজিক আৰু অবৈধ কাৰ্যকলাপৰ বিৰুদ্ধে অদম্যভাৱে কাম কৰাৰ প্ৰতিশ্ৰুতি দিছে আনন্দ মিশ্ৰই। সংবাদ মাধ্যমৰ আগত আনন্দ মিশ্ৰই ১৫-২০ দিনৰ ভিতৰত লখিমপুৰত নকল সোণৰ বেহা, ড্ৰাগছ আদি বন্ধ কৰাৰ প্ৰতিশ্ৰুতি প্ৰদান কৰিছে। আনন্দ মিশ্ৰৰ এই প্ৰতিশ্ৰুতি কিমান সফল হয়, সেয়া সময়ত লক্ষ্যনীয় হ’ব।
