তামিলনাডুত সন্ধান পোৱা গৈছে তিমিৰ বমি সৰবৰাহ চক্ৰৰ। ৰাজহ বিষয়াই টুটিকোৰিন উপকূলত অভিযান চলাই ১৮ কেজি বমি জব্দ কৰে। যাৰ বৰ্তমান বজাৰ মূল্য প্ৰায় ৩১ কোটি ৬৭ লাখ টকা।
যোৱা ১৮ মে’ত ৰাজহ বিভাগৰ বিষয়াসকলে গোপন সূত্ৰৰ পৰা তথ্য লাভ কৰিছিল যে তামিলনাডুৰ উপকূলৰ পৰা তিমিৰ বমি চোৰাংভাৱে অনা হৈছে। সেই খবৰ পাই শনিবাৰে বিষয়াসকলে টুটিকোৰিন উপকূলত অভিযান চলায়।
গাড়ীৰে চোৰাংভাৱে বমিখিনি সৰবৰাহ কৰা হৈছিল। তদন্তকাৰী দলে গাড়ীখন জব্দ কৰি সন্মুখৰ চিটৰ তলৰ পৰা ১৮ কেজি ১০০ গ্ৰাম বমি উদ্ধাৰ কৰে। লগতে ৫ জন লোকক গ্ৰেপ্তাৰ কৰা হয়।
লগতে পঢ়ক: ডিব্ৰুগড়ত জঘণ্য কাণ্ড! চিকিৎসালয়ৰ কৰ্মচাৰীয়ে মথাউৰিত পেলাই দিলে নৱজাতকক
ধৃত লোককেইজনে জনোৱা মতে, তিমিৰ বমি প্ৰায়ে টুটিকোৰিন উপকূলৰ পৰা চোৰাংভাৱে অনা হয়। কিন্তু ক’ত সৰবৰাহৰ হয় সেই সন্দৰ্ভত তেওঁলোকে মুখ খোলা নাই। অৱশ্যে তদন্তকাৰী বিষয়াসকলে এই বমি ক’ৰ পৰা সৰবৰাহ কৰা হৈছিল সেই কথা জানিবলৈ চেষ্টা চলাইছে। কেৱল সেয়াই নহয়, তেওঁলোকে এই সৰবৰাহৰ চক্ৰটো ক’ত ক’ত বিয়পি পৰিছে সেই কথাও জানিবলৈ চেষ্টা চলাইছে।
তিমিৰ বমিক ‘এম্বাগ্ৰিছ’ বুলি কোৱা হয়। আন্তঃৰাষ্ট্ৰীয় বজাৰত ‘স্পাৰ্ম হোয়েল’ৰ বমিৰ বিৰাট দাম। চাহিদাও বেছি। এই তিমি প্ৰজাতিটো বন্যপ্ৰাণী সুৰক্ষা আইন, ১৯৭২ৰ অধীনত সংৰক্ষিত প্ৰাণীৰ তালিকাত অন্তৰ্ভুক্ত কৰা হৈছে।
লগতে পঢ়ক: প্ৰধানমন্ত্ৰীৰ হাতত উচ্চতম ন্যায়ালয়ৰ ক্ষমতা! প্ৰতিবাদত ৰাজপথলৈ ওলাই আহিল লাখ লাখ লোক
ৰাজহ বিভাগৰ বিষয়াসকলে কয় যে এনেধৰণৰ চোৰাং ব্যৱসায় ৰোধ কৰিবলৈ উপকূলীয় অঞ্চলত চোৰাংচোৱাগিৰি বৃদ্ধি কৰা হ’ব। ৰাজহ বিভাগে বিগত দুবছৰত ৪০ কেজি বমি উদ্ধাৰ কৰিবলৈ সক্ষম হৈছে। আন্তঃৰাষ্ট্ৰীয় বজাৰত ইয়াৰ মূল্য ৫৪ কোটি টকা বুলি কোৱা হৈছে।
