ৰাজ্য আৰু দেশৰ ৰাজনীতিত পৰিয়ালকেন্দ্ৰিক পৰম্পৰা অক্ষুণ্ণ ৰাখি আজি বিজেপিত আনুষ্ঠানিকভাবে যোগদান কৰে ৰাজ্যিক বিজেপিৰ সভাপতি তথা সৰভোগ সমষ্টিৰ বিধায়ক ৰঞ্জিত দাসৰ কন্যা ৰোজীশ্ৰিয়া ৰণজিত দাসে।
বৰপেটা লোকসভা সমষ্টিৰ মিত্ৰজোটাৰ প্ৰাৰ্থী কুমাৰ দীপক দাসৰ নিৰ্বাচনী প্ৰচাৰৰ বাবে অনুষ্ঠিত কৰা এখন জনসভাত অসমৰ মুখ্যমন্ত্ৰী সৰ্বানন্দ সোণোৱালৰ উপস্থিতিত আনুষ্ঠানিকভাবে গেৰুৱা দলটোৰ সদস্য পদ গ্ৰহণ কৰে ৰোজীশ্ৰিয়াই।
আনহাতে, ৰঞ্জিত দাসৰ কন্যাৰ উপৰি কেইবাটাও ৰাজনৈতিক দলৰ ভালেসংখ্যক সদস্যই আজি আনুষ্ঠানিক ভাবে বিজেপিত যোগদান কৰে। বৰপেটাৰ নিৰ্বাচনী সভাখনত মুখ্যমন্ত্ৰী সোণোৱালৰ উপৰি অসম গণ পৰিষদৰ সভাপতি অতুল বৰাৰ লগতে বি টি চি প্ৰধান হাগ্ৰামা মহিলাৰীয়ে অংশগ্ৰহণ কৰি কুমাৰ দীপক দাসৰ হৈ প্ৰচাৰ চলাই।
উল্লেখযোগ্য যে, কিছুদিন পূৰ্বে অসম চৰকাৰৰ মন্ত্ৰী কেশৱ মহন্তৰ ভাতৃ মণি মাধৱ মহন্তয়ো সদৌ অসম ছাত্ৰ সন্থাৰ পৰা আহি অগপত যোগদান কৰিছিল আৰু কলিয়াবৰ লোকসভা সমষ্টিৰ পৰা মিত্ৰজোটৰ প্ৰাৰ্থী হিচাপে নিৰ্বাচনত প্ৰতিদ্বন্দ্বিতা কৰে।
প্ৰাক্তন মুখ্য মন্ত্ৰী তৰুণ গগৈৰ পুত্ৰ গৌৰৱ গগৈ, কেশৱ মহন্তৰ ভাতৃ মণিমাধৱ মহন্ত, ভৰত নৰহৰ পত্নী ৰাণী নৰহ, বিজয়া চক্ৰৱৰ্তীৰ কন্যা সুমন হৰিপ্ৰিয়াকে ধৰি ভালেসংখ্যক নেতাই পৰিয়ালকেন্দ্ৰিক ৰাজনীতিৰ তালিকাখনক দীঘলীয়া কৰি থকাৰ সময়তে আজি ৰঞ্জিত দাসৰ কন্যাই বিজেপিত যোগদান কৰাৰ লগে লগে তালিকখনত আন এটা নামৰ সংযোজন ঘটিল।
