বাঙালী যুৱ ছাত্ৰ ফেডাৰেচন তথা শতাধিক দল-সংগঠনে আজি অসম বন্ধৰ আহ্বান জনাইছিল। এই অসম বন্ধক লৈ প্ৰকৃততে অসম ৰাজ্যিক বিজেপিৰ সমৰ্থন আছে নে নাই, তাক লৈ প্ৰশ্ন উত্থাপন হৈছে।
অসম ৰাজ্যিক বিজেপিৰ মুখপাত্ৰ ৰূপম গোস্বামীয়ে ‘অসম বন্ধৰ সমৰ্থনত বিজেপি দল পূৰ্বৰে পৰা নাই’ বুলি আজি ৰাজ্যিক বিজেপিৰ কাৰ্য্যালয়ত সংবাদমেল যোগে ঘোষণা কৰাৰ বিপৰীতে বৰাক উপত্যকাৰ কৰিমগঞ্জ জিলা বিজেপিৰ সভাপতি সুব্ৰত ভট্টাচাৰ্য্যই অসম বন্ধক সমৰ্থন জনাই কালি প্ৰকাশ কৰিছিল এক প্ৰেছ বিবৃতি।
কালি কৰিমগঞ্জ জিলা বিজেপিৰ সভাপতি সুব্ৰত ভট্টাচাৰ্য্যই বাঙালী ভাষাতে জিলা বিজেপিৰ পেডত ৫ জনকৈ নীৰিহ লোকৰ প্ৰতি গভীৰ শ্ৰদ্ধাঞ্জলি প্ৰদৰ্শন কৰি লগতে বাঙালী সংগঠনে দিয়া ২৪ ঘন্টীয়া অসম বন্ধৰ প্ৰতি সমৰ্থন জনাবলৈ সকলোকে আহ্বান জনাইছিল।
উক্ত প্ৰেছ বিবৃতিত তেওঁ লিখিছিল এইদৰে ‘কালি সন্ধিয়া অসমৰ তিনিচুকীয়া জিলাৰ খেৰবাৰী গাঁৱৰ ৫ জন নীৰিহ গাওঁবাসীক নৃশংসভাৱে হত্যা কৰা ঘটনাৰ তীব্ৰ নিন্দা দিয়াৰ লগতে আত্মাৰ চিৰশান্তি কামনা কৰিছো। এই হত্যাৰ পাছত নিষিদ্ধ ঘোষিত সংগঠন ‘আলফাৰ’ হাত থকা বুলি সংবাদ মাধ্যমত প্ৰকাশ পাইছে। বিগত কিছুদিন ধৰি অখিল গগৈ সহ অন্য কেইবাগৰাকী ব্যক্তিয়ে যিভাৱে হিন্দু বাঙালীৰ বিৰুদ্ধে উচটনিমূলক বক্তব্য দি এনে পৰিস্থিতিৰ সৃষ্টি কৰিছে তাৰ বাবে কৰিমগঞ্জ জিলা বিজেপিয়ে কঠোৰ আইনী ব্যৱস্থা ল’বৰ বাবে আহ্বান জনাইছে।‘
আনহাতে সেই বিবৃতিটোৰ শেষৰফালে স্পষ্টকৈ লিখা আছে ‘ভৱিষ্যতে এনে কোনো ঘটনাৰ পুনৰাবৃত্তি নঘটে তাৰ বাবে যাবতীয় ব্যৱস্থা গ্ৰহণ কৰিবৰ বাবে জিলা বিজেপিয়ে দাবী জনাইছো আৰু কাইলৈ অৰ্থ্যাৎ আজি কৰিমগঞ্জ জিলা ৰাষ্ট্ৰবাদী হিন্দু যুৱ ছাত্ৰ সংগঠন সহ অন্যান্য কিছু ৰাষ্ট্ৰবাদী, সংগঠনে দিয়া বন্ধক সফল কৰি তোলাৰ কাৰণে আমাৰ নৈতিক সমৰ্থন আছে।‘
মন কৰিব লগীয়া যে ‘অসম বন্ধ’ৰ বিৰুদ্ধে অৱস্থান লোৱা ৰূপম গোস্বামীক আজি উক্ত প্ৰেছ বিবৃতিৰ সম্পৰ্কত নৰ্থ ইষ্ট নাওৰ সাংবাদিকে সোধাত তেওঁ উভটি ধৰে।
তেওঁ কয় ‘ক’ত আছে, কি কথা মোক দেখুৱাওক প্ৰমাণ যদি আছে। আমাৰ দলৰ ফালৰ পৰা কোনো তেনেকুৱা হোৱা নাই।‘
অৱশেষত, যদি তেনেকুৱা কিবা হৈছে তেন্তে দলৰ ফালৰ পৰা বিহিত ব্যৱস্থা গ্ৰহণ কৰা হ’ব বুলি তেওঁ সংবাদমেলত স্থিতি স্পষ্ট কৰে।
তেওঁৰ প্ৰত্যাহ্বান গ্ৰহণ কৰি নৰ্থ ইষ্ট নাও-এ এই প্ৰতিবেদনৰ জৰিয়তে তথ্য প্ৰমাণ দিলে। এতিয়া নিজৰ কথা ৰাখি তেওঁ কৰিমগঞ্জ জিলা বিজেপিৰ সভাপতিজনৰ বিৰুদ্ধে কি ব্যৱস্থা গ্ৰহণ লয় সেয়া লক্ষণীয় হ’ব।
