আজি হাফলঙত সংবাদ মেল পাতি ৰাজ্যিক নিৰ্বাচন আয়ুক্ত এইচ এন বৰাই প্ৰকাশ কৰিছে যে ২০১৯ৰ ১৫ ফেব্ৰুৱাৰীৰ ভিতৰতেই উত্তৰ কাছাৰ পাৰ্বত্য স্বায়ত্ত শাসিত পৰিষদৰ সাধাৰণ নিৰ্বাচন অনুষ্ঠিত কৰা হ’ব। অহা জানুৱাৰিত নিৰ্বাচনী বিজ্ঞপ্তি জাৰি কৰিব নিৰ্বাচন আয়োগে।
ৰাজ্যিক নিৰ্বাচন আয়ুক্ত গৰাকীয়ে লগতে কয় যে অতি শীঘ্ৰেই নিৰ্বাচনী বিজ্ঞপ্তি জাৰি কৰা হ’ব। ইয়াৰ উপৰি নিৰ্বাচনী প্ৰস্তুতিৰ কাৰণে ব্যৱস্থা গ্ৰহণ কৰিব জিলা ৰিটাৰ্নিং বিষয়াই।
উল্লেখনীয় যে উত্তৰ কাছাৰ পাৰ্বত্য স্বায়ত্ত শাসিত পৰিষদৰ কাৰ্যকাল ৩ জুন তাৰিখে অন্ত পৰিছিল যদিও কিন্তু ষষ্ঠ অনুসূচীৰ মুৰব্বী ৰাজ্যপাল অধ্যাপক জগদীশ মুখিয়ে জাতীয় নাগৰিকপঞ্জী উন্নীতকৰণৰ অজুহাত দৰ্শাই পৰিষদৰ কাৰ্যকাল আৰু ৬মাহ বৃদ্ধি কৰিছিল।
আনহাতে বৰ্দ্ধিত ৬মাহৰ কাৰ্যকাল ৩ ডিচেম্বৰত অন্ত পৰাৰ আগতেই ৰাজ্যপালে নতুনকৈ তিনিমাহ কাৰ্যকাল বৃদ্ধি কৰে। অবশ্যে ইয়াৰ আগতেই হাফলঙৰ প্ৰাক্তন বিধায়ক সমৰজিত হাফলংবাৰে ৰাজ্যপালে উত্তৰ কাছাৰ পাৰ্বত্য স্বায়ত্ত শাসিত পৰিষদৰ কাৰ্যকাল বৃদ্ধিৰ বিষয়টোক প্ৰত্যাহ্বান জনাই উচ্চতম ন্যায়ালয়ত এটা জনস্বাৰ্থ জড়িত গোচৰ তৰিছিল। প্ৰাক্তন বিধায়কগৰাকীৰ গোচৰৰ সুত্ৰ ধৰি ন্যায়ালয়ে চুড়ান্ত ৰায় দিয়ে যে ১৫ ফেব্ৰুৱাৰীৰ ভিতৰত যিকোনো পৰিস্থিতিত নিৰ্বাচনৰ কাম-কাজ শেষ কৰিব লাগিব।
ইপিনে সম্প্ৰতি ডিমা হাচাও অগপ, এনপিপি আৰু কংগ্ৰেছৰ ১০ জনীয়া এটা প্ৰতিনিধি দলে ৰাজ্যপাল অধ্যাপক জগদীশ মুখিক সাক্ষাৎ কৰি শীঘ্ৰেই নিৰ্বাচন অনুষ্ঠিত কৰাৰ দাবী উত্থাপন কৰে।
আজিৰ সংবাদমেলত উপস্থিত থাকে ৰাজ্য চৰকাৰৰ দুগৰাকী অ’এছডি ক্ৰমে অৱসৰপ্ৰাপ্ত আয়ুক্ত সচিব মুকুট গগৈ আৰু ৰঞ্জিত সোম। ইয়াৰ উপৰিও উপস্থিত আছিল জিলা ৰিটাৰ্নিং বিষয়া তথা জিলা উপায়ুক্ত অমিতাভ ৰাজখোৱা, ডিমা হাছাও জিলাৰ আৰক্ষী অধীক্ষকক প্ৰশান্ত শইকীয়া, জিলা তথ্য আৰু জনসংযোগ বিষয়া পূৰবী ফংল’।
