বিশ্ববিদ্যালয়ৰ নাম সলনি, নতুনকৈ নামকৰণ কৰা হ’ল ৰতন টাটা বিশ্ববিদ্যালয়

মহাৰাষ্ট্ৰ চৰকাৰে মহাৰাষ্ট্ৰ ৰাজ্যিক দক্ষতা বিশ্ববিদ্যালয়ৰ নাম সলনি কৰি পদ্ম বিভূষণ ৰতন টাটা মহাৰাষ্ট্ৰ ৰাজ্যিক দক্ষতা বিশ্ববিদ্যালয় (Padma Vibhushan Ratan Tata Skills University) কৰিছে। ১৪ অক্টোবৰত অনুষ্ঠিত ৰাজ্য চৰকাৰৰ কেবিনেট বৈঠকত এই সিদ্ধান্ত লোৱা হৈছে।

ৰাজ্যখনৰ উন্নয়ন মন্ত্ৰী মংগল প্ৰভাত লোধাই এই কথা জানিবলৈ দিছে। যোৱা ৯ অক্টোবৰৰ মাজনিশা টাটা গ্ৰুপৰ অধ্যক্ষ ৰতন টাটাৰ মৃত্যু হয়।

ৰতন টাটা কেৱল এজন সন্মানীয় উদ্যোগপতিয়েই নহয়, বৰঞ্চ সমাজৰ উন্নতিৰ বাবে নিজৰ জীৱন উৎসৰ্গা কৰা এজন মহান ব্যক্তি আছিল। শিক্ষা, স্বাস্থ্যসেৱা আৰু গ্ৰাম্য উন্নয়নৰ ক্ষেত্ৰত তেওঁৰ অৱদানে দেশত প্ৰভূত অৰিহনা যোগাইছে।

লগতে পঢ়কঃ পুনৰ উত্তপ্ত ভাৰত-কানাডাৰ কূটনৈতিক সম্পৰ্ক! কানাডাৰ ৬ গৰাকী ‘ৰাষ্ট্ৰদূত’ক দিল্লী এৰাৰ নিৰ্দেশ, অট’ৱা এৰিছে ভাৰতীয় ৰাষ্ট্ৰদূতেও

ইফালে মহাৰাষ্ট্ৰৰ মুখ্যমন্ত্ৰী একনাথ শ্বিণ্ডেই ৰতন টাটাক ‘ভাৰতৰ সন্তান’ আৰু ‘গৌৰৱ’ বুলি প্ৰশংসা কৰি সঁচা অৰ্থত ‘মূল্যবান ৰতন’ বুলি অভিহিত কৰে।

শ্বিণ্ডেই তেওঁৰ প্ৰেৰণাদায়ক সৰলতা আৰু দূৰদৰ্শী দৃষ্টিভংগীৰ উদ্ধৃতি দি টাটাৰ উল্লেখযোগ্য অৱদানৰ ওপৰত আলোকপাত কৰে। ভাৰতৰ ভৱিষ্যত গঢ় দিয়াত টাটাই গুৰুত্বপূৰ্ণ ভূমিকা পালন কৰিছে। তেওঁ কয় যে ৰতন টাটাক ভাৰত ৰত্নেৰে সন্মান জনোৱা উচিত।

মহাৰাষ্ট্ৰ ৰাজ্যিক দক্ষতা বিশ্ববিদ্যালয়ত ছাত্ৰ-ছাত্ৰীসকলক নিয়োগৰ বাবে পাঠ্যক্ৰমৰ প্ৰশিক্ষণ দিয়া হয়। ১৭ একৰ মাটিত বিস্তৃত এই বিশ্ববিদ্যালয়খন মহাৰাষ্ট্ৰৰ পানভেলত অৱস্থিত। মহাৰাষ্ট্ৰৰ প্ৰথমখন দক্ষতা বিশ্ববিদ্যালয়।

লগতে পঢ়কঃপ্ৰেমৰ ক্ষেত্ৰত এইবোৰ কথাই ধ্বংস কৰে সম্পৰ্ক, কৈছে চাণক্য নীতিয়ে

বিশ্ববিদ্যালয়খনে দক্ষতা পাঠ্যক্ৰমৰ লগতে অভিযান্ত্ৰিক, ব্যৱস্থপনা আৰু তথ্য-প্ৰযুক্তিকে ধৰি অন্যান্য খণ্ডৰ চাকৰিৰ বাবেও ছাত্ৰ-ছাত্ৰীক প্ৰশিক্ষণ দিয়ে। এই বিশ্ববিদ্যালয়খন ২০১৭ চনত মহাৰাষ্ট্ৰ ৰাজ্যিক দক্ষতা বিকাশ সংস্থা আইন ২০১৫ৰ অধীনত প্ৰতিষ্ঠা কৰা হৈছিল।