খালিস্তানপন্থী সন্ত্ৰাসবাদী হৰদীপ সিং নিজ্জৰৰ হত্যাৰ প্ৰসংগই ভাৰত-কানাডাৰ কূটনৈতিক সম্পৰ্ক পুনৰ উত্তপ্ত কৰি তুলিছে। কানাডাই ভাৰতীয় উচ্চায়ুক্তগৰাকীক এই হত্যাকাণ্ডত জড়িত বুলি অভিযোগ উত্থাপন কৰিছে। ভাৰতে এই বিষয়ত কঠোৰ ব্যৱস্থা গ্ৰহণ কৰিছে।
কানাডাত থকা ভাৰতৰ ৰাষ্ট্ৰদূত সঞ্জয় কুমাৰ ভাৰ্মাক দেশলৈ উভতি যাবলৈ নিৰ্দেশ দিয়া হৈছে। তদুপৰি বৈদেশিক পৰিক্ৰমা মন্ত্ৰালয়ে দিল্লীত নিয়োজিত ৬ জন কানাডাৰ কূটনীতিবিদক দেশ এৰি যাবলৈ নিৰ্দেশ দিছে।
যোৱা বছৰৰ জুন মাহত হৰদীপ সিং নিজ্জৰক হত্যা কৰা হৈছিল। ইয়াৰ পিছত প্ৰধানমন্ত্ৰী ট্ৰুডোৱে নিজেই অভিযোগ কৰে যে ভাৰতৰ চোৰাংচোৱা সংস্থা নিজ্জৰ হত্যাকাণ্ডত জড়িত। অৱশ্যে সেই সময়ত দিল্লীয়ে এই ‘ভিত্তিহীন অভিযোগ’ খাৰিজ কৰিছিল। সঞ্জয় কুমাৰ ভাৰ্মাৰ বিৰুদ্ধে কানাডাৰ তদন্তকাৰী সংস্থাৰ বিবৃতিত পুনৰ বিতৰ্কৰ সৃষ্টি হৈছে।
ভাৰতীয় উচ্চায়ুক্ত সঞ্জয় কুমাৰ ভাৰ্মা এই গোচৰত ‘স্বাৰ্থ সম্পৰ্কিত ব্যক্তি’ বুলি তেওঁলোকে দাবী কৰে। মূলতঃ কূটনৈতিক সুৰক্ষাৰ বাবেই তেওঁৰ বিৰুদ্ধে কোনো ব্যৱস্থা লোৱা নহ’ল। এই মন্তব্যৰ পিছত দিল্লীয়ে পাছলৈ ভাৰতত থকা কানাডাৰ ৰাষ্ট্ৰদূত ষ্টুয়াৰ্ট হুইলাৰক তলব কৰে। তেওঁৰ পৰা গোটেই বিষয়োৰ বাখ্যা বিচৰা হ’ল। স্পষ্টকৈ কৰা হৈছে যে কানাডা চৰকাৰে উত্থাপন কৰা অভিযোগ সম্পূৰ্ণ ভিত্তিহীন।
সোমবাৰে এই বিষয়ক লৈ বৈদেশিক পৰিক্ৰমা মন্ত্ৰালয়ে এক বিবৃতি প্ৰকাশ কৰে। তাত কোৱা হৈছে, বাৰে বাৰে অনুৰোধ কৰা হৈছিল। কিন্তু কানাডা চৰকাৰে নিজ্জৰ হত্যাকাণ্ডত ভাৰত জড়িত থকাৰ কোনো প্ৰমাণ দাঙি ধৰা নাই। এতিয়া ভোট বেংকৰ স্বাৰ্থত ভাৰতক অপমান কৰা হৈছে। সাম্প্ৰতিক পৰিস্থিতিত কানাডা চৰকাৰে ৰাষ্ট্ৰদূত সঞ্জয় কুমাৰক নিৰাপত্তা প্ৰদান কৰিব বুলি কোনো আশা নাই। যাৰ বাবে ভাৰতৰ ৰাষ্ট্ৰদূত সঞ্জয় কুমাৰ ভাৰ্মা আৰু কানাডা চৰকাৰে লক্ষ্য কৰি লোৱা অন্যান্য কূটনীতিবিদসকলক ঘৰলৈ উভতি আহিবলৈ নিৰ্দেশ দিয়া হৈছে।
আনহাতে, বিশেষজ্ঞসকলে দাবী কৰে যে কানাডা চৰকাৰৰ এই আচৰণৰ কাৰণ হ’ল কানাডাৰ আসন্ন সংসদীয় নিৰ্বাচন। সেইবাবেই নতুনকৈ নিজ্জৰ হত্যা প্ৰসংগ টানি আনি ট্ৰুডো চৰকাৰে ৰাজনীতি আৰম্ভ কৰিছে। লক্ষ্য হৈছে উগ্ৰ খালিস্তানী গোটসমূহৰ সমৰ্থন লাভ কৰা।
ইফালে বৈদেশিক পৰিক্ৰমা মন্ত্ৰালয়ে দিল্লীত থকা ৬ জন কানাডাৰ কূটনীতিবিদক দেশ এৰি যাবলৈ কৈছে। অহা শনিবাৰে নিশা ১১:৫৯ বজাৰ ভিতৰত এই দেশ এৰি যাব লাগিব। এই তালিকাত আছে ভাৰপ্ৰাপ্ত উচ্চায়ুক্ত ষ্টুয়াৰ্ট ৰছ হুইলাৰ, উপ উচ্চায়ুক্ত পেট্ৰিক হেবাৰ্টৰ লগতে ৪ জন সচিব।
উল্লেখ্য যে যোৱা বছৰৰ ১৮ জুনত কানাডাত আততায়ীয়ে গুলীয়াই হত্যা কৰিছিল খালিস্তান টাইগাৰ ফৰ্চ সংগঠনৰ মুৰব্বী হৰদীপ সিং নিজ্জৰক। ভাৰত চৰকাৰৰ উগ্ৰপন্থীৰ হিট লিষ্টৰ প্ৰথম শাৰীত এই উগ্ৰপন্থীৰ নাম আছিল। মৃত্যু বাৰ্ষিকী উপলক্ষে কানাডাৰ হাউছ অৱ কমনছৰ অধ্যক্ষ গ্ৰেগ ফ’গাৰ্ছে নিজ্জৰৰ বাবে শোক বাৰ্তা পাঠ কৰে। ইয়াৰ পিছতে তেওঁ বৰ্তমানৰ সাংসদসকলক নিজ্জৰৰ মৃত্যুত এক মিনিট মৌনতা অৱলম্বন কৰিবলৈ কয়।
কানাডাৰ সংসদত এই ঘটনা পোহৰলৈ অহাৰ পিছতে আৰম্ভ হয় এক নতুন বিতৰ্কৰ। প্ৰধানমন্ত্ৰী ট্ৰুডোৱে অভিযোগ কৰে যে এই হত্যাকাণ্ডৰ আঁৰত ভাৰত আছে। সেই ঘটনাই ভাৰত-কানাডাৰ সম্পৰ্ক পুনৰ উত্তপ্ত কৰি তুলিছে।
