ছাত্ৰী প্ৰহাৰৰ ঘটনাক লৈ আজিও উত্তপ্ত ডিমৌ; পুনৰ আৰক্ষীৰ ২৪ ঘণ্টাৰ সময়সীমা
ছাত্ৰী প্ৰহাৰৰ ঘটনাকৈ লৈ আজিও উত্তপ্ত হৈ পৰে ডিমৌৰ ৰাজপথ। আজি আছু, আটাছু বৃহত্তৰ অসমীয়া যুৱ মঞ্চ, আটছাকে ধৰি কেবাটাও জাতীয় সংগঠনৰ নেতৃত্বত ডিমৌ মহাবিদ্যালয়ৰ প্ৰায় তিনি শতাধিক ছাত্ৰ-ছাত্ৰীয়ে দুঘণ্টাৰো অধিক সময় ৰাষ্ট্ৰীয় ঘাইপথ অৱৰোধ কৰে।
উল্লেখযোগ্য যে ১৪ আগষ্ট, বুধবাৰে প্ৰিয়া দাস নামৰ ডিমৌ মহাবিদ্যালয়ৰ স্নাতক প্ৰথম ষান্মাসিকৰ এগৰাকী ছাত্ৰীক এগৰাকী মহিলাই আক্ৰমণ কৰি ধৰাশায়ী কৰিছিল।
ডিমৌ চাৰিআলিৰ মেনকা ষ্টুডিঅ’ত ছাত্ৰী প্ৰিয়া দাসে শিক্ষা সম্পৰ্কীয় অনলাইন কাম কৰি থকা অৱস্থাত স্মৃতিৰেখা ফুকন নামৰ এগৰাকী মহিলাই চোকা অস্ত্ৰৰে প্ৰহাৰ কৰে। ফলত ছাত্ৰীগৰাকীয়ে মূৰত গুৰুতৰভাৱে আঘাত পাই ঢলি পৰে।
লগে লগে লগৰীয়াসকলে ছাত্ৰীগৰাকীক ডিমৌ আদৰ্শ চিকিৎসালয়ত ভৰ্তি কৰে। ইফালে ঘটনা সংঘটিত কৰি আক্ৰমণকাৰী মহিলাগৰাকীয়ে ঘটনাস্থলীৰ পৰা পলায়ন কৰে।
আনহাতে এই ঘটনাৰ খবৰ পোৱাৰ লগে লগে আটছা, আছু, আটাছু, বৃহত্তৰ অসমীয়া যুৱ মঞ্চ আদি ছাত্ৰ সংগঠনৰ লগতে ডিমৌ কলেজৰ ছাত্ৰ-ছাত্ৰীসকল সৰৱ হৈ পৰে আৰু সন্ধিয়া ডিমৌ থানা ঘেৰাও কৰি পৰিবেশ উত্তাল কৰি তোলে। পিছত আৰক্ষীয়ে ২৪ ঘণ্টাৰ ভিতৰত অভিযুক্তক আটক কৰাৰ কথা কোৱাত পৰিস্থিতি শাম কাটে।
কিন্তু আজি ২৪ ঘণ্টা পাৰ হৈ যোৱাৰ পিছতো অভিযুক্তক গ্ৰেপ্তাৰ কৰিবলৈ সক্ষম নোহোৱাত কলেজ এৰি ৰাজপথত ছাত্ৰ-ছাত্ৰীসকলে প্ৰতিবাদ সাব্যস্ত কৰি পৰিৱেশ উত্তাল কৰি তোলে।
এনেদৰে দুঘণ্টাৰো অধিক সময় ৰাজপথ অৱৰোধ কৰি পৰিবেশ উত্তাল কৰাৰ পিছত শিৱসাগৰ জিলাৰ অতিৰিক্ত আৰক্ষী অধীক্ষক বলিন দেউৰীয়ে স্থানীয় দণ্ডাধীশ মনোৰমা মৰাঙৰ উপস্থিতিত পুনৰ ২৪ ঘণ্টাৰ ডেডলাইন দিয়াত পৰিস্থিতি শাম কাটে।