বিধেয়ক বিৰোধী আন্দোলনকাৰীক ‘গুলী চালনা’ৰ চি বি আই তদন্ত দাবী তিপ্ৰাছা ছাত্ৰ সংগঠনৰ

নাগৰিকত্ব সংশোধনী বিধেয়ক বাতিলৰ দাবীত যোৱা ৮ জানুৱাৰিত নেছ’ই আহ্বান জনোৱা উত্তৰ-পূব বন্ধৰ সময়ছোৱাত প্ৰতিবাদকাৰীৰ ওপৰত ত্ৰিপুৰা আৰক্ষীৰ দলে বৰ্বৰতা প্ৰদৰ্শন কৰা সমগ্ৰ বিষয়টো সন্দৰ্ভত এতিয়া চি বি আইৰ তদন্ত দাবী কৰিছে তিপ্ৰাছা ছাত্ৰ সংগঠনে। তদুপৰি ছাত্ৰ সংগঠনটোৱে বহু বিতৰ্কিত নাগৰিকত্ব সংশোধনী বিধেয়কখন বাতিলৰো দাবী জনায়।

‘৮ জানুৱাৰিত বিধেয়কখন বাতিলৰ দাবীত আহ্বান জনোৱা উত্তৰ-পূব বন্ধৰ সময়ছোৱাত প্ৰতিবাদকাৰীৰ ওপৰত ত্ৰিপুৰা আৰক্ষীৰ দলে নিৰ্বিচাৰ গুলীচালনা কৰিলে। য’ত ছজনকৈ লোক গুলীবিদ্ধ হৈ গুৰুতৰভাৱে আঘাতপ্ৰাপ্ত হৈছিল। কিন্তু ইমানৰ পাছতো নিমাত হৈ আছে ত্ৰিপুৰাৰ মুখ্য মন্ত্ৰী। সেয়ে আমি উক্ত গুলীবৰ্ষণৰ চি বি আই তদন্ত দাবী কৰিছো’। এইদৰে সংঘমিত্ৰা নামৰ ছাত্ৰীনেত্ৰী এগৰাকীয়ে কয়।

ছাত্ৰীনেত্ৰীগৰাকীয়ে লগতে কয় যে নিৰ্দোষী লোকক নিৰাপত্তা প্ৰদান কৰিব নোৱাৰা এইখন বিজেপি চৰকাৰে শাসনত থকাৰ অধিকাৰ হেৰুৱাই পেলাইছে।

‘আমি নাগৰিকত্ব সংশোধনী বিধেয়ক বাতিল কৰাৰ দাবী জনাইছো। এই বিধেয়কখন গৃহীত হ’লে আমি আমাৰ অধিকাৰ হেৰুৱাই পেলোৱাৰ লগতে আমি নিজৰ মাটিতে গুৰুত্বহীন হৈ পৰিম’। এইদৰে পুনৰ সংঘমিত্ৰাই কয়।

উল্লেখ্য যে এই বিতৰ্কিত বিধেয়কখনৰ বিৰুদ্ধে ত্ৰিপুৰাৰ একাংশ ছাত্ৰ-ছাত্ৰীয়ে নতুন দিল্লীৰ যন্তৰ-মন্তৰতো প্ৰতিবাদ সাব্যস্ত কৰে। এই প্ৰতিবাদৰ সময়ত ত্ৰিপুৰাৰ ছাত্ৰ-ছাত্ৰীসকলক মণিপুৰৰ ছাত্ৰ সংগঠনেও সহযোগ কৰা পৰিলক্ষিত হয়।

ইয়াৰ উপৰি বিধেয়কখনৰ বিৰুদ্ধে দেশজোৰা প্ৰতিবাদ গঢ়ি তুলিব বুলিও এজন ছাত্ৰ নেতাই জানিবলৈ দিয়ে।