দিল্লীৰ অৰুণ জেটলী ষ্টেডিয়ামত অনুষ্ঠিত হোৱা আই পি এল ২০২৫ৰ এই খেলখন এক মৰ্যাদাৰ যুঁজ ৰূপ লৈছিল। প্লে অফৰ দৌৰৰ পৰা বাহিৰ হোৱা ছানৰাইজাৰ্ছ হায়দৰাবাদ আৰু কলকাতা নাইট ৰাইডাৰ্ছ দল দুটাই গুৰুত্বহীন অথচ উত্তেজনাপূৰ্ণ মেচত মুখামুখি হয়। অৱশ্যে খেলপথাৰত একপক্ষীয় আধিপত্য প্ৰদৰ্শন কৰি হায়দৰাবাদে ১১০ ৰানত বিশাল জয় লাভ কৰে। একে সময়তে তিনিখন মেচত ধাৰাবাহিক জয়েৰে তেওঁলোকৰ আই পি এল অভিযান সামৰে।
হায়দৰাবাদৰ অধিনায়ক পেট কামিন্সে টছত জয়লাভ কৰি প্ৰথমে বেটিং কৰিবলৈ সিদ্ধান্ত লয় আৰু তেওঁৰ দলটোৱে আৰম্ভণিৰে পৰাই আক্ৰমণাত্মক বেটিং কৰি কলকাতাৰ বলাৰসকলক দিশহাৰা কৰে। প্ৰথম উইকেটৰ যুটীত অ’পেনাৰ অভিষেক শৰ্মা (১৬ বলত ৩২) আৰু ট্ৰেভিছ হেডে (৪০ বলত ৭৬) দুৰ্দান্ত আৰম্ভণি কৰে। মাত্ৰ পাঁচ অভাৰতে দলটোৱে পঞ্চাশৰ সীমা অতিক্ৰম কৰে।
সপ্তম অভাৰত সুনীল নাৰিনে প্ৰথমটো ব্ৰেকথ্ৰু কঢ়িয়াই আনি অভিষেকক ঘূৰাই পঠিয়ায়। তাৰ পাছত ১৩ নং অভাৰত নাৰিনে পুনৰ ষ্ট্ৰাইক কৰে, এইবাৰ হেডক ঘূৰাই পঠিয়ায়। কিন্তু ইয়াৰ পিছত যি ঘটিল এক কথাত ক’বলৈ গ’লে সেয়া আছিল বিধ্বংসী।
হেনৰিক ক্লাছেন আৰু ঈশান কিষানে এক বিস্ফোৰক পাৰ্টনাৰশ্বিপ গঢ়ি তোলে। ১৯ অভাৰত কিষান (২০ বলত ২৯) আউট হৈছিল যদিও আনটো মূৰত থিয় হৈ ক্লাছেনে মাত্ৰ ৩৯টা বলত আই পি এলৰ ইতিহাসত যৌথ তৃতীয়টো দ্ৰুততম শতক অৰ্জন কৰে।
ক্লাছেনৰ বেটিং ‘ক্লাছ‘ দেখি মুগ্ধ হৈ পৰে ক্ৰিকেট অনুৰাগী। তেওঁৰ ইনিংছটো আছিল ৭টা চাৰি আৰু ৯টা ছয়েৰে সজোৱা ১০৫ ৰানৰ এক দুৰ্দান্ত ইনিংছ। তেওঁ মাত্ৰ ৩৭ টা বলতে শতক অৰ্জন কৰে। শেষৰ অভাৰত অনিকেত ভাৰ্মাই (১২*) এটা চাৰি আৰু এটা ছয় মাৰি দলটোৰ স্কোৰ ২৭৮ ৰানলৈ যায়। এই বিশাল ৰানৰ পাহাৰটো দৰাচলতে কলকাতাৰ সাধ্যৰ বাহিৰত আছিল।
২৭৯ ৰানৰ বিশাল লক্ষ্য অনুসৰণ কৰি কেকেআৰ আৰম্ভণিতে চাপত পৰিছিল। অ’পেনাৰৰ উইকেট আৰম্ভণিতে হেৰুৱাৰ পিছত দলটোৱে নিয়মীয়া ব্যৱধানত মিডল অভাৰত উইকেট হেৰুৱাই থাকিল। কেপ্তেইন অজিংক্য ৰাহানে বিফল হয়, আনহাতে, মিডল অৰ্ডাৰৰ কোনোৱে তিষ্ঠিৱ নোৱাৰিলে।
মনীষ পাণ্ডেই (২৩ বলত ৩৭) কিছু যুঁজ দিবলৈ চেষ্টা কৰিছিল যদিও সেয়া যথেষ্ট নহ’ল। হায়দৰাবাদৰ বলিং বিভাগৰ ফৰ্ম আছিল অতি উত্তম। হৰ্ষ ডুবে, জয়দেৱ উনাদকাট আৰু ঈশান্ত মালিংগাই তিনিটাকৈ উইকেট দখল কৰি ১৮.৪ অভাৰত মাত্ৰ ১৬৮ ৰানতে কলকাতাক অল আউট কৰে।
যোৱা ছিজনত ৰানাৰ্ছ আপৰ স্থান দখল কৰা ছানৰাইজাৰ্ছ হায়দৰাবাদে বহু আশাৰে ২০২৫ চনৰ প্ৰতিযোগিতাত প্ৰৱেশ কৰে। কিন্তু গোটেই ছিজনটোত বেটিং আৰু বলিং দুয়োটা বিভাগতে ধাৰাবাহিকতাৰ অভাৱ লক্ষ্যণীয় আছিল। কিন্তু শেষৰ তিনিখন মেচত একেৰাহে জয়ী হৈ তেওঁলোকে প্ৰমাণ কৰিলে যে এই দলটোত প্ৰতিভাৰ অভাৱ নাই, মাত্ৰ ধাৰাবাহিকতা আৰু সঠিক ছন্দৰ প্ৰয়োজন।
আনহাতে, কলকাতা নাইট ৰাইডাৰ্ছৰ বাবে এইটো অধিক হতাশাজনক ছিজন আছিল। বর্তমান চেম্পিয়ন হিচাপে খেলপথাৰত প্রৱেশ কৰা দলটোৱে ক’তো নিজৰ সম্ভাৱনাৰে খেলিব পৰা নাছিল৷ খেলখনৰ শেষত অধিনায়ক ৰাহানেৰ মুখত নিৰাশা স্পষ্ট হৈ পৰিছিল।
এই মেচখনত হেনৰিক ক্লাছেন নিঃসন্দেহে চৰ্চাত আছে। ৩৯টা বলত ১০৫ ৰানৰ তেওঁৰ উজ্জ্বল ইনিংছে দলটোক এক স্মৰণীয় জয়ত সহায় কৰে। লগতে পেট কামিন্সৰ সবল নেতৃত্ব আৰু যুৱ বলাৰসকলৰ প্ৰদৰ্শন। বিশেষকৈ হৰ্ষ ডুবে আৰু মালিংগাৰ বলিঙে হায়দৰাবাদৰ ভৱিষ্যতৰ সম্ভাৱনা উজ্জ্বল কৰি তুলিছে।
