ন্যায়াধীশ নিযুক্তিত কেন্দ্ৰৰ বিলম্বত অসন্তুষ্ট উচ্চতম ন্যায়ালয়; আইন সচিবলৈ জাননী জাৰি

কেন্দ্ৰই ন্যায়িক ব্যৱস্থাৰ সৰ্বোচ্চ পৰ্যায়ত নিযুক্তিৰ বাবে ন্যায়াধীশ বাছনি কৰাত পলম কৰিছে। উচ্চতম ন্যায়ালয়ে মোডী চৰকাৰক ইয়াৰ বাবে ভৰ্ৎসনা কৰিছে। কেন্দ্ৰই উচ্চতম ন্যায়ালয়ৰ কলেজিয়ামৰ দ্বাৰা যিসকলৰ নাম অনুমোদিত হৈছে তেওঁলোকৰ ক্ষেত্ৰতো অৱহেলা কৰিছে। যিটো একেবাৰে গ্ৰহণ কৰিব নোৱাৰি।

ন্যায়াধীশ এছ কে কৌল আৰু এ এছ ওকাৰ বিচাৰপীঠে কয় যে এনেদৰে নামসমূহ পেলাই ৰখাটো মানি ল’ব নোৱাৰি। প্ৰসংগক্ৰমে, বোম্বাই উচ্চ ন্যায়ালয়ৰ মুখ্য ন্যায়াধীশ দীপংকৰ দত্তক শীৰ্ষ ন্যায়ালয়ৰ ন্যায়াধীশ হিচাপে নিযুক্তি দিয়া হৈছে। কিন্তু প্ৰায় পাঁচ সপ্তাহৰ পাছতো কেন্দ্ৰই তেওঁক নিযুক্তিৰ জাননী জাৰি কৰা নাই। কেৱল তেওঁৱেই নহয়, আন কেইবাজনো ন্যায়াধীশৰ নিযুক্তি একেধৰণে আৱদ্ধ হৈ আছে। সেইকাৰণে উচ্চতম ন্যায়ালয় কেন্দ্ৰৰ ওপৰত ক্ষুব্ধ হৈ পৰিছে।

লগতে পঢ়ক: সংসদতে সুৰক্ষিত নহয় ব্ৰিটিছ মহিলা! ৪০ জন ‘কামাতুৰ’ পুৰুষ সাংসদৰ বিৰুদ্ধে চাঞ্চল্যকৰ অভিযোগ

শীৰ্ষ আদালতখনে মন্তব্য কৰে, “বিচাৰপীঠত দক্ষ আইনজীৱী নাথাকিলে আইন আৰু ন্যায় ব্যৱস্থাৰ শাসন ক্ষতি হয়।‘’

শুকুৰবাৰে শীৰ্ষ ন্যায়ালয়ে কেন্দ্ৰীয় আইন মন্ত্ৰালয়ৰ ন্যায় সচিব আৰু অতিৰিক্ত সচিবলৈ জাননী জাৰি কৰিছে। তেওঁলোকৰ বিৰুদ্ধে উচ্চতম ন্যায়ালয়ৰ নিযুক্তিৰ ২০ এপ্ৰিলৰ সময়সীমা “ইচ্ছাকৃতভাৱে অমান্য” কৰাৰ অভিযোগ অনা হৈছে।

যোৱা বছৰ এপ্ৰিলত উচ্চতম ন্যায়ালয়ে কৈছিল যে কলেজিয়ামৰ অনুমোদন পোৱাৰ তিনিৰ পৰা চাৰি সপ্তাহৰ ভিতৰত ন্যায়াধীশসকলক নিযুক্তি দিব লাগিব। শীৰ্ষ আদালতখনে কৈছে যে সেই নিয়ম অনুসৰণ কৰা হোৱা নাই।

লগতে পঢ়ক:উভতিল ফৰ্ম: এছিয়ান চেম্পিয়নশ্বিপত স্বৰ্ণ জিনিলে লাভলীনাই

উল্লেখ্য যে কলেজিয়াম উচ্চতম ন্যায়ালয় আৰু উচ্চ ন্যায়ালয়ৰ ন্যায়াধীশ নিযুক্তিৰ বাবে দায়বদ্ধ। কিন্তু তেওঁলোকৰ পৰামৰ্শ স্বত্বেও কেন্দ্ৰই আপত্তি কৰিব পাৰে। শীৰ্ষ ন্যায়ালয়ৰ বক্তৱ্য হ’ল যে কলেজিয়ামৰ পৰামৰ্শ স্বত্বেও কেন্দ্ৰৰ ফালৰ পৰা কিয় পলম কৰা হৈছে সেয়া স্পষ্ট নহয়।