উচ্চতম ন্যায়ালয়ে বুধবাৰে আদানি গ্ৰুপ-হিণ্ডেনবাৰ্গ বিতৰ্কত কেন্দ্ৰীয় চৰকাৰৰ পৰা চীলড কভাৰত ৰখা পৰামৰ্শ নথি গ্ৰহণ কৰিবলৈ অস্বীকাৰ কৰে। আদানি বিষয়ত শ্বেয়াৰ বজাৰৰ নিয়মবোৰ অধিক কঠোৰ কৰাৰ বিষয়টোত যি এটা বিশেষজ্ঞ পেনেলৰ প্ৰসংগ উত্থাপন হৈছিল তাকলৈয়ে চৰকাৰৰ তৰফৰ পৰা পৰামৰ্শৰ নথি দাখিল কৰা হৈছিল।
শীৰ্ষ ন্যায়ালয়ে কয় যে তেওঁলোকে বন্ধ আৱৰণত ৰখা কেন্দ্ৰৰ পৰামৰ্শ গ্ৰহণ নকৰে। ইয়াৰ আঁৰৰ কাৰণ হিচাপে উল্লেখ কৰা হৈছে স্বচ্ছতাৰ প্ৰসংগ।
আদানি-হিণ্ডেনবাৰ্গ বিষয়ত উচ্চতম ন্যায়ালয়ৰ এই পদক্ষেপে প্ৰকৃততে এক নতুন ৰূপ লৈছে। শুনানিৰ সময়ত মুখ্য ন্যায়াধীশ ডি ৱাই চন্দ্ৰচূড়ে কয়, “আমি এই ক্ষেত্ৰত সম্পূৰ্ণ স্বচ্ছতা বজাই ৰাখিব বিচাৰো। যদি আমি চীল কৰা আৱৰণৰ ভিতৰত থকা কেন্দ্ৰৰ পৰামৰ্শ গ্ৰহণ কৰোঁ, তেন্তে স্বাভাৱিকতে আন পক্ষই নাজানিব। আমি বিনিয়োগকাৰীসকলৰ সম্পূৰ্ণ স্বচ্ছতা বিচাৰো। আমিয়েই এখন সমিতি গঠন কৰিম। যদি আদালতে এনে কৰে, তেন্তে বিষয়টোৰ ওপৰত মানুহৰ সম্পূৰ্ণ আস্থা থাকিব।‘’
যোৱা কেইসপ্তাহমান ধৰি হিণ্ডেনবাৰ্গ ৰিচাৰ্চে আদানি গ্ৰুপৰ ওপৰত একাউণ্ট জালিয়াতিৰ অভিযোগ উত্থাপন কৰিছে। তেতিয়াই আদানি গ্ৰুপৰ হাতত থকা সকলো শ্বেয়াৰৰ মূল্য যথেষ্ট হ্ৰাস পায়।
বিগত ১০ ফেব্ৰুৱাৰীত উচ্চতম ন্যায়ালয়ে আদানি গ্ৰুপৰ বিৰুদ্ধে ষ্টক জালিয়াতিৰ অভিযোগৰ পৰিপ্ৰেক্ষিতত শ্বেয়াৰ বজাৰৰ নিয়মবোৰ কঠোৰ কৰিবলৈ আহ্বান জনাইছিল। কেন্দ্ৰক এজন ন্যায়াধীশৰ নেতৃত্বত বিশেষজ্ঞৰ এটা পেনেল স্থাপন কৰিবলৈ পৰামৰ্শ দিয়া হৈছিল। কেন্দ্ৰই জনায় যে ভাৰতীয় চিকিউৰিটিজ এণ্ড এক্সচেঞ্জ ব’ৰ্ডকে ধৰি বিভিন্ন আইনী সংস্থাই এই কাম কৰিব পাৰে।
জানিব পৰা গৈছে যে উচ্চতম ন্যায়ালয়ৰ বাৰ্তাৰ পিছত কেন্দ্ৰই সমিতিৰ সদস্যসকলৰ তালিকা দাখিল কৰে। শুকুৰবাৰে কেন্দ্ৰই এখন বন্ধ আৱৰণেৰে ঢাকি থোৱা খামত তালিকাখন উচ্চতম ন্যায়ালয়ত দাখিল কৰিছিল। যিটো উচ্চতম ন্যায়ালয়ে গ্ৰহণ নকৰিলে। দেশৰ শীৰ্ষ ন্যায়ালয়ে এই বিষয়টোত স্বচ্ছতাৰ প্ৰসংগ তুলি ধৰিছে।
