দেশৰ ৬৬% সংস্থাই কাম আদায়ৰ বাবে চৰকাৰী বিষয়াক দিছে উৎকোচ! চাঞ্চল্যকৰ প্ৰতিবেদন

আদানী গোষ্ঠীৰ বিৰুদ্ধে উত্থাপিত উৎকোচ কেলেংকাৰিক লৈ দেশজুৰি চৰ্চা অব্যাহত আছে। তাৰ মাজতে শেহতীয়া এক সমীক্ষাত দাবী কৰা হৈছে যে ভাৰতৰ আধাতকৈ অধিক কোম্পানীয়ে ব্যৱসায় চলাবলৈ চৰকাৰক উৎকোচ দিবলগীয়া হয়। অন্ততঃ যোৱা এবছৰৰ পৰিসংখ্যাত ইয়াৰ প্ৰমাণ স্পষ্ট।

সমীক্ষা অনুসৰি ৬৬শতাংশ কোম্পানীয়ে ১২মাহত উৎকোচ দিছিল। ইয়াৰে ৪৬ শতাংশই ব্যক্তিগতভাৱে চৰকাৰী বিষয়াক ধন দি কাম ক্ষিপ্ৰতাৰে আদায় কৰিছে। আৰু বাকী ৫৪ শতাংশই উৎকোচ দিবলৈ বাধ্য হৈছে ।

যোৱা ২২ মে’ৰ পৰা ৩০ নৱেম্বৰলৈ অনলাইন প্লেটফৰ্ম “লোকেল চাৰ্কেলে” দেশৰ ১৫৯খন জিলাৰ ১৮ হাজাৰ সংগঠনৰ মাজত এই সমীক্ষা চলাইছিল। তাত নাম প্ৰকাশত অনিচ্ছুক ৬৬ শতাংশ সংস্থাই জনায় যে চৰকাৰী কাৰ্যালয়ৰ দ্বাৰা কাম সম্পন্ন কৰিবলৈ, ক্লিয়াৰেন্স পাবলৈ, আনকি বহু ক্ষেত্ৰত নথিৰ ডুপ্লিকেট পাবলৈও সংশ্লিষ্ট বিষয়াক ধন দিব লাগে। মাটি আৰু ঘৰৰ লগত জড়িত প্ৰায় সকলো ধৰণৰ কামৰ বাবে ধনৰ প্ৰয়োজন। কিছুমান ক্ষেত্ৰত ইচ্ছাকৃতভাৱে কাম বন্ধ কৰি দিয়া হয়। ইয়াৰ ভিতৰত অনুজ্ঞা পত্ৰ প্ৰদান, ফাইল হস্তান্তৰ, আদেশ জাৰি কৰা, যোগ্যতাৰ নথি-পত্ৰ প্ৰদান আৰু চৰকাৰী আৱন্টনৰ টকা লাভ কৰা আদি অন্তৰ্ভুক্ত।

লগতে পঢ়কঃ জুনিয়ৰ মহিলা হকী এছিয়া কাপত বাংলাদেশক ১৩-১ গ’লত পৰাস্ত কৰিলে টিম ইণ্ডিয়াই

একাংশৰ মতে সেই সংখ্যা আগৰ তুলনাত কমিছে। কিন্তু তথাপিও বেছিভাগ ক্ষেত্ৰতে যিটো কাম সাধাৰণভাৱে হ’ব লাগে, সেই কামটো টকা নিদিয়াকৈ কৰিব নোৱাৰি।

সমীক্ষা অনুসৰি প্ৰায় ৭৫শতাংশ উৎকোচৰ ধন আইন বিভাগ, জোখ-মাখ বিভাগ, খাদ্য, চিকিৎসা আৰু স্বাস্থ্য আদি বিভাগৰ বিষয়াসকলৰ হাতলৈ গৈছে। বহু ক্ষেত্ৰত জি এছ টি কৰ্তৃপক্ষ, প্ৰদূষণ বিভাগ, পৌৰ নিগম আৰু বিদ্যুৎ বিভাগৰ বিষয়াসকলৰ পকেটত সোমাইছে।

চৰকাৰী কাৰ্যালয়ত চিচিটিভি কেমেৰা থাকিলেও বন্ধ দুৱাৰৰ আঁৰত উৎকোচৰ লেনদেন চলে। ১৬ শতাংশ কোম্পানীয়ে দাবী কৰে যে তেওঁলোকে কেতিয়াও কোনো উৎকোচ দিয়া নাই। সকলো কাম নিয়ম অনুসৰি হৈছে। ১৯ শতাংশই তেওঁলোকৰ উৎকোচ দিয়াৰ প্ৰয়োজন হোৱা নাই বুলি কয়।

লগতে পঢ়কঃ শিশুসকলৰ হোম ছিকনেছ – শিশুৰ গৃহ-কাতৰতা লক্ষণ; জানক ইয়াৰ কাৰণ আৰু প্ৰতিকাৰ

ডেলয়ট ইণ্ডিয়াৰ তথ্য অনুসৰি বহু সংস্থাই বিশ্বাস কৰে যে নীতি আৰু কামৰ ক্ষেত্ৰত আপোচ কৰিলে নিয়ন্ত্ৰক কৰ্তৃপক্ষৰ চকুত পৰা নাযায় বা জৰিমনা ভৰিব লগা নহয়। এনে মনোভাৱে অতীতত কাম কৰিলেও সময় সলনি হৈছে। উৎকোচৰ অভিযোগ ক্ৰমান্বয়ে আৰু বেছিকৈ পোহৰলৈ আহিছে। সংস্থাসমূহৰ পৰিচালনা গাঁথনিলৈ চাই দুৰ্নীতি হ্ৰাস কৰাত মনোনিৱেশ কৰিব লাগিব। “লোকেল চাৰ্কেলে” দাবী কৰিছে যে এই ক্ষেত্ৰত কেন্দ্ৰৰ নেটৰ জৰিয়তে সামগ্ৰী ক্ৰয়ৰ ব্যৱস্থাই কাম দিছে। কিন্তু কিছুমান ক্ষেত্ৰত দুৰ্নীতিৰ পথ মুকলি হৈ আছে।