কোনে দিছিল সূৰ্যক ‘স্কাই’ নাম! নিজ মুখে ক’লে সূৰ্যকুমাৰ যাদৱে
বিশ্ব ক্ৰিকেটত নতুন ৩৬০° বেটাৰ হিচাপে পৰিচিত হৈ পৰিছে ভাৰতৰ তাৰকা বেটাৰ সূৰ্যকুমাৰ যাদৱ। আন্তৰ্জাতিক ক্ৰিকেটত অভিষকেৰ পিছত এদিনীয়াত ব্যৰ্থ হ’লেও টি-২০ত সূৰ্যই ধাৰাবাহিকভাৱে দেখুৱাই আহিছে দমনীয় প্ৰদৰ্শন।
এনে ধাৰাবাহিকতাৰ সুবাদতে সূৰ্যকুমাৰ যাদৱ সম্প্ৰতি টি-২০ ফৰ্মেটত বেটাৰ ৰেংকিঙত শীৰ্ষস্থানত আছে। বিস্ফোৰক বেটাৰগৰাকী এতিয়া ক্ৰিকেট বিশ্বত ‘স্কাই’ নামেৰে জনপ্ৰিয় হৈ পৰিছে। দুৰন্ত বেটিঙেৰে সঁচাকৈয়ে যেন স্কাই অৰ্থাৎ আকাশ স্পৰ্শ কৰিছে যাদৱে!
সূৰ্যকুমাৰ যাদৱ নামটোৰ ইংৰাজী আখৰৰ সংযোজন ঘটাই তেওঁক এইদৰে ‘স্কাই’ বুলি নামাকৰণ কৰা বুলি সকলোৱে বুজিব পাৰে। কিন্তু এই স্কাই নাম যাদৱে কিদৰে পালে বা কোনে তেওঁক এই নাম দিলে, সেই বিষয়ে কোনো জ্ঞাত নাছিল।
পিছে সূৰ্যকুমাৰ যাদৱে শেহতীয়াকৈ নিজেই জানিবলৈ দিছে তেওঁৰ এই নামাকৰণৰ আঁৰৰ ব্যক্তিজনৰ পৰিচয়। যাদৱে সদৰী কৰা মতে, তেওঁক এই নাম দিছিল ভাৰতৰ প্ৰাক্তন তাৰকা ক্ৰিকেটাৰ গৌতম গম্ভীৰে।
সূৰ্যকুমাৰ যাদৱে ২০১৪ চনৰ পৰা ২০১৭ চনলৈ চাৰিটা ছিজন ইণ্ডিয়ান প্ৰিমিয়াৰ লীগৰ ফ্ৰেন্সাইজি কলকাতা নাইট ৰাইডাৰ্ছক প্ৰতিনিধি কৰিছিল। সেই সময়ত দলটোৰ অধিনায়ক আছিল গম্ভীৰ। তেতিয়াই গম্ভীৰে সূৰ্যক দিছিল স্কাই নাম।
যাদৱে উল্লেখ কৰা মতে, এদিন গম্ভীৰে যাদৱৰ ওচৰলৈ আহি হঠাতে তেওঁক ‘স্কাই’ বুলি মাতিছিল। নতুন নামটো শুনি দলটোৰ আন খেলুৱৈসকল অলপ আচৰিত হয়। যাদৱেও জানিব পৰা নাছিল যে তেওঁকে স্কাই বুলি সম্বোধন কৰা হৈছে।
তাৰ পিছতহে গম্ভীৰে বুজাই দিয়ে নামটোৰ অৰ্থ। সূৰ্যকুমাৰ যাদৱ- এই দীঘল নামৰ পৰা চুটি কৰি গম্ভীৰে নামৰ প্ৰথম আখৰকেইটা সংযোগ ঘটাই চমুকৈ স্কাই নামাকৰণ কৰিছিল। আৰু এই স্কাই নামেৰেই এতিয়া ক্ৰিকেট বিশ্বত জনপ্ৰিয় হৈ পৰিছে যাদৱ।