আন্তঃৰাষ্ট্ৰীয় ক্ৰিকেট পৰিষদ, চমুকৈ আইচিচিয়ে আজি ঘোষণা কৰে ২০২৩ বৰ্ষৰ শ্ৰেষ্ঠ টি-২০ দল। ঘোষিত এই দলটোত স্থান লাভ কৰিছে চাৰিগৰাকীকৈ ভাৰতীয় ক্ৰিকেটাৰে।
বৰ্ষশ্ৰেষ্ঠ এই টি-২০ দলটোত অধিনায়ক হিচাপে বাচনি কৰা হৈছে ভাৰতৰ তাৰকা বেটাৰ সূৰ্যকুমাৰ যাদৱক। অৱশ্যে দলত স্থান পোৱা নাই সম্প্ৰতিক সময়ৰ অন্যতম শ্ৰেষ্ঠ তাৰকা কোহলী, ৰোহিত আৰু বুমৰাহে।
এই তিনি তাৰকাই দীৰ্ঘসময় ধৰি টি-২০ ফৰ্মেটত অংশ নোলোৱাৰ বাবেই স্বাভাৱিকতে ঘোষিত দলটোত স্থান পোৱা নাই। তাৰ পৰিৱৰ্তে দলত স্থান পাইছে তিনিগৰাকী উদীয়মান তাৰকাই।
যাদৱৰ লগতে দলত স্থান পোৱা এই তিনি তাৰকা হৈছে অপেনিং বেটাৰ যশস্বী জয়ছোৱাল, লেগ স্পিনাৰ ৰবি বিষ্ণৈ আৰু পেচাৰ অৰ্শদীপ সিং। গুৰুত্বপূৰ্ণভাৱে দলত স্থান পাইছে উগাণ্ডাৰ এগৰাকী ক্ৰিকেটাৰে।
লগতে জিম্বা”ৱেৰ দুগৰাকী, নিউজিলেণ্ড, ইংলেণ্ড, ৱেষ্ট ইণ্ডিজ আৰু আয়াৰলেণ্ডৰ এগৰাকীকৈ খেলুৱৈয়ে ঘোষিত দলটোত স্থান লাভ কৰিছে। অপেনিং যুটী হিচাপে আছে ভাৰতীয় যুটি যাদৱ আৰু যশস্বী।
ইয়াৰ পিছতে বেটিং ক্ৰমত আছে ইংলেণ্ডৰ ফিল ছল্ট, নিউজিলেণ্ডৰ মাৰ্ক চেপমেন, ৱেষ্ট ইণ্ডিজৰ উইকেট কীপাৰ বেটাৰ নিকোলাছ পুৰাণ।
অল ৰাউণ্ডাৰ হিচাপে আছে জিম্বাব’ৱেৰ ছিকন্দাৰ ৰাজা, উগাণ্ডাৰ আলপেশ ৰামজানি আৰু আয়াৰলেণ্ডৰ মাৰ্ক আডায়াৰ। সেইদৰে বলিং আক্ৰমণত অৰ্শদীপ আৰু বিষ্ণৈৰ লগত আছে জিম্বাব’ৱেৰ ৰিচাৰ্ড নগাৰাভা।
