Sushila Devi from Manipur clinches silver in judo ভাৰতৰ জুডোকা সুশীলা দেৱীয়ে কমনৱেলথ গেমছত এক দৃষ্টান্ত গঢ়িছে। ২৭ বছৰীয়া মণিপুৰী কন্যা সুশীলাই জুডোত ৪৮ কিলোগ্ৰাম শাখাত ৰূপৰ পদক অৰ্জন কৰি ভাৰতৰ বাবে আৰু এটা পদকৰ সংখ্যা বৃদ্ধি কৰিলে।
সুশীলাই সোমবাৰে মহিলাৰ ৪৮ কিলোগ্ৰামৰ ছেমিফাইনেলত প্ৰৱেশ কৰিছিল। ২০১৯ চনত দক্ষিণ এছিয়ান গেমছৰ স্বৰ্ণ পদক বিজয়ী মৰিচাছৰ প্ৰিচিলা মোৰাণ্ডক পৰাস্ত কৰি ফাইনেলত উপনীত হয়। ফলত পদক জয় কৰাটো নিশ্চিত হৈ পৰে। কিন্তু সোণ আজুৰি অনাত ব্যৰ্থ হয়। ফাইনেলত সুশীলাই তীব্ৰ প্ৰতিদ্বন্দ্বিতা আগবঢ়াই দক্ষিণ আফ্ৰিকাৰ মিকাৱেলা হোৱাইটবুইৰ হাতত পৰাজিত হয়।
ইয়াৰ পূৰ্বে, সুশীলা দেৱীয়ে ২০১৪ চনত গোল্ড কোষ্টত অনুষ্ঠিত কমনৱেলথ গেমছতো জুডোত ৰূপৰ পদক জিকিছিল। এইবাৰো তেওঁ ৰূপৰ পদক জিকিলে। ভাৰতৰ আন কোনো জুডো খেলুৱৈৰ এই কৃতিত্ব নাই।
উল্লেখ্য যে এতিয়ালৈকে ভাৰতৰ ৬ টা পদক ভাৰোত্তোলনৰ পৰাই আহিছে। সংকেত চাৰ্গাৰে বাৰ্মিংহামত ভাৰতৰ হৈ পদক জয়ৰ শুভাৰম্ভণি কৰিছিল। তেওঁ ৫৫ কিলোগ্ৰাম শাখাত অভিলেখ গঢ়ি ৰূপ জিকিছিল। তাৰপিছতে গুৰুৰাজা পূজাৰীয়ে ৬১ কিলোগ্ৰাম শাখাত ব্ৰঞ্জ জিকে।
ইয়াৰ পিছতে ৪৯ কিলোগ্ৰাম শাখাত টকিঅ’ অলিম্পিকৰ ৰূপৰ পদক অৰ্জন কৰা মীৰাবাই চানুৱে স্বৰ্ণ জয় কৰে। বিন্দিয়াৰাণী দেৱীয়ে দেশখনৰ বাবে ইয়াৰ চতুৰ্থটো পদক আজুৰি আনে। তেওঁ ৫৫ কিলোগ্ৰাম শাখাত ৰূপৰ পদক জিকিছিল। যোৱা সেইদৰে ষষ্ঠটো পদক নিশ্চিত কৰিছিল অচিন্ত্য শিউলিয়ে। অচিন্ত্যই ৭৩ কিলোগ্ৰাম শাখাৰ ভাৰোত্তোলনত স্বৰ্ণ জয় কৰি দেশলৈ সুনাম কঢ়িয়াই আনিছিল।
