লাচিত দিৱসৰ দিনাই এ পি এছ চিৰ প্ৰাৰম্ভিক পৰীক্ষা পতাক লৈ অসন্তুষ্ট তাই আহোম যুৱ পৰিষদ
আগন্তুক লাচিত দিৱসৰ দিনটো চৰকাৰী বন্ধৰ দিন যদিও অসম লোকসেৱা আয়োগে এ পি এছ চিৰ প্ৰাৰম্ভিক পৰীক্ষা অনুষ্ঠিত কৰিবলৈ ওলোৱা কথাত প্ৰতিক্ৰিয়া প্ৰকাশ কৰিছে টাই আহোম যুৱ পৰিষদে।
সংগঠনটোৰ নেতৃত্বই এখন সংবাদমেলত চৰকাৰৰ এনে দুৰ্বোধ্য স্থিতিত অসন্তুষ্টি প্ৰকাশ কৰিছে।
“এফালে তেওঁলোকে লাচিতৰ জয়গান গায় আৰু আনফালে লাচিত দিৱসৰ দিনাই স্কুল-কলেজ খুলি পৰীক্ষাও পাতে। এয়া কেনেকুৱা বিসংগতিপূৰ্ণ স্থিতি?” টাই আহোম যুৱ পৰিষদৰ নেতৃত্বই কয়।
উল্লেখযোগ্য যে সংগঠনটোৱে অহা ২৩ আৰু ২৪ নৱেম্বৰত শ্ৰীমন্ত শংকৰদেৱ কলাক্ষেত্ৰত কেন্দ্ৰীয়ভাৱে লাচিত দিৱসৰ আয়োজন কৰিছে। এই দিৱসতে সংগঠনটোৱে এই বৰ্ষৰ লাচিত বঁটা প্ৰদান কৰিব ৰাষ্ট্ৰীয় নাগৰিকপঞ্জী উন্নীতকৰণত বিশেষ ভূমিকা গ্ৰহণ কৰা প্ৰদীপ ভূঞাক।
সংগঠনটোৰ নেতাসকলে কয় যে লাচিত দিৱসৰ দিনটোতে চৰকাৰে পৰীক্ষা অনুষ্ঠিত কৰি লাচিতক অপমানহে কৰিছে।
আনহাতে পৰীক্ষা পতাৰ ফলত লাচিত দিৱসৰ কেন্দ্ৰীয় অনুষ্ঠানটোত ব্যাঘাত জন্মিব বুলিও মন্তব্য কৰে সংগঠনটোৰ বিষয়ববীয়াসকলে
