চীনৰ সতৰ্কবাণীৰ মাজতে বুধবাৰে নিউয়ৰ্কত উপস্থিত হয় টাইৱানৰ ৰাষ্ট্ৰপতি ছাই ইং-ৱেন। মধ্য আমেৰিকালৈ যোৱাৰ পথত ছাই নিউয়ৰ্কত ৰয়। নিউয়ৰ্কত বিৰতিৰ লে তেওঁ টাইপেইৰ কূটনৈতিক মিত্ৰ গুৱেটামালা আৰু বেলিজলৈ যাত্ৰা কৰিব। সম্পৰ্ক সুদৃঢ় কৰাৰ লক্ষ্যৰে ৰাষ্ট্ৰপতি ছাইয়ে দুয়োখন দেশৰ নেতাৰ সৈতে বৈঠকত মিলিত হ’ব।
উভতি অহাৰ পথত আমেৰিকাৰ কেলিফৰ্ণিয়াত বিৰতি ল’ব ছাই। তাত তেওঁ আমেৰিকাৰ হাউছ অৱ ৰিপ্ৰেজেণ্টেটিভৰ অধ্যক্ষ কেভিন মেককাৰ্থীৰ সৈতে বৈঠকত মিলিত হোৱাৰ সম্ভাৱনা আছে।
ছাইয়ে যদি মেককাৰ্থীৰ সৈতে সাক্ষাৎ কৰে তেন্তে চীনে পদক্ষেপ গ্ৰহণৰ কথা সকীয়াই দিছে। কালি বেইজিঙে সকীয়াই দিছিল যে চীনে ছাই আৰু মেককাৰ্থীৰ যিকোনো বৈঠকৰ তীব্ৰ বিৰোধিতা কৰে।
ইপিনে, বেইজিঙৰ পৰা অহা এনে ভাবুকিৰ প্ৰতি সঁহাৰি জনাই চীনক অতিমাত্ৰা প্ৰতিক্ৰিয়া প্ৰকাশ নকৰিবলৈ সকীয়াই দিছে আমেৰিকাই।
চীনে দাবী কৰিছে যে টাইৱান ইয়াৰ ভূখণ্ডৰ অবিচ্ছেদ্য অংগ। তেওঁলোকে এদিন বেইজিঙৰ ‘এক চীন’ নীতিৰ অধীনত অঞ্চলটোক একত্ৰিত কৰিব। চীনৰ নীতি অনুসৰি কোনো দেশেই বেইজিং আৰু টাইপেইৰ সৈতে একে সময়তে আনুষ্ঠানিক সম্পৰ্ক বজাই ৰাখিব নোৱাৰে।
কালি নিউয়ৰ্কত উপস্থিত হোৱাৰ পিছত ছাইক হোটেললৈ যোৱা দেখা গৈছে। তাত চীনৰ পতাকা লৈ কেইবাজনো বেইজিং সমৰ্থক প্ৰতিবাদকাৰী সমবেত হয়। ওচৰতে টাইৱান সমৰ্থক সকলে বেনাৰ লৈ আছিল।
ৱাশ্বিংটনত থকা চীনৰ দূতাবাসৰ চাৰ্জ ডি এফেয়াৰ্ছ জু জুইয়ানে কয় যে তেওঁ ছাইৰ ভ্ৰমণ সন্দৰ্ভত কেইবাবাৰো আমেৰিকাৰ বিষয়াৰ সৈতে পোনপটীয়াকৈ কথা পাতিছিল। ছাইৰ এই ভ্ৰমণে চীনৰ মৌলিক স্বাৰ্থ ভংগ কৰিব বুলি তেওঁলোকক সকীয়াই দিয়ে।
চীন দূতাবাসৰ চাৰ্জ অৱ এফেয়াৰ্ছে কয় যে ‘আমি আমেৰিকাৰ পক্ষক আহ্বান জনাইছো যে টাইৱান বিষয়ত জুইৰ সৈতে খেলাৰ পুনৰাবৃত্তি নকৰিব’।
আমেৰিকাৰ হাউছ অৱ ৰিপ্ৰেজেণ্টেটিভছৰ অধ্যক্ষ মেককাৰ্থীয়ে কয় যে তেওঁ ছাইক তেওঁৰ গৃহ ৰাজ্য কেলিফৰ্ণিয়াত সাক্ষাৎ কৰিব। অৱশ্যে টাইৱান কৰ্তৃপক্ষই দুয়োৰে মাজত হোৱা আলোচনা এতিয়াও নিশ্চিত কৰা নাই।
যোৱা বছৰ আমেৰিকাৰ প্ৰতিনিধি সদনৰ তেতিয়াৰ অধ্যক্ষ নেন্সি পেলোছিয়ে টাইৱান ভ্ৰমণ কৰিছিল। সেই সময়ত চীনে তেওঁৰ এই ভ্ৰমণক লৈ ক্ষুব্ধ প্ৰতিক্ৰিয়া প্ৰকাশ কৰিছিল। নেন্সি পেলোছিৰ সেই ভ্ৰমণৰ প্ৰতিক্ৰিয়া দেখুৱাই চীনে টাইৱানৰ আশে-পাশে বৃহৎ সামৰিক অনুশীলন চলাইছিল।
