নিৰ্বাচনত বিজয়ী হ’লে আইফোন, ২০ লাখ টকীয়া গাড়ীৰ লগতে আৰু বহুতো চকু কপালত উঠা প্ৰতিশ্ৰুতিৰ জোৱাৰ।
নিৰ্দলীয় এইগৰাকী প্ৰাৰ্থীয়ে আনকি মহাজাগতিক উপহাৰ দিয়াৰো প্ৰতিশ্ৰুতি আগবঢ়াইছে।
প্ৰাৰ্থীগৰাকীৰ প্ৰতিশ্ৰুতিৰ ভিতৰত আছে চন্দ্ৰলৈ এশ দিনৰ ভ্ৰমণৰ সুযোগ।
ইমানতেই শেষ নহয় এই নিৰ্দলীয় প্ৰাৰ্থীৰ মেটমৰা প্ৰতিশ্ৰুতিৰ সম্ভাৰৰ।
তামিলনাডুৰ আসন্ন বিধানসভা নিৰ্বাচনৰ এগৰাকী নিৰ্দলীয় প্ৰাৰ্থীয়ে আগবঢ়াইছে এই শুনি মন ভৰি যোৱা প্ৰতিশ্ৰুতিৰ বন্যা।
তামিলনাডুৰ বিধানসভা নিৰ্বাচনত প্ৰতিদ্বন্দ্বিতা কৰিবলগীয়া প্ৰাৰ্থীসকলে নিৰ্বাচনী বৈতৰণী পাৰ হ’বলৈ ভোটাৰসকলক বিভিন্ন উপহাৰৰ টোপ দিছে।
টিভি, ৱাশ্বিং মেচিনৰ পৰা আৰম্ভ কৰি সোণৰ মুদ্ৰালৈকে সকলো আছে প্ৰতিশ্ৰুতিৰ তালিকাত। কিন্তু এই সকলোকে পিছ পেলাই দিছে আৰ সৰ্বাননে।
সৰ্বাননে এইবাৰ দক্ষিণ মাদুৰাই সমষ্টিৰ পৰা নিৰ্দলীয় প্ৰাৰ্থী হিচাপে প্ৰতিদ্বন্দ্বিতা আগবঢ়াইছে। প্ৰাৰ্থীগৰাকীৰ প্ৰতিশ্ৰুতিৰ তালিকাখন বেচ দীঘলীয়া।
প্ৰাৰ্থীগৰাকীয়ে আগবঢ়োৱা প্ৰতিশ্ৰুতিসমূহৰ ভিতৰত আছে ছুইমিং পুলকে ধৰি তিনিমহলীয়া ঘৰ, ২০ লাখ টকীয়া গাড়ী, প্ৰতি ঘৰ মানুহৰ বাবে সৰু আকাৰৰ হেলিকপ্টাৰ, ঘৰৰ কাম কৰাৰ বাবে ৰব’টকে ধৰি আৰু বহুতো।
প্ৰাৰ্থীগৰাকীৰ এনে অবিশ্বাস্য প্ৰতিশ্ৰুতিসমূহ দেখি স্বাভাৱিকতেই সকলোৰে চকু কপালত উঠা কথা।
পিচে, সৰ্বাননৰ এনে প্ৰতিশ্ৰুতিৰ আঁৰৰ কাহিনী অন্যহে। তেওঁ দৰাচলতে ভোটাৰসকলক সচেতন কৰি তুলিব বিচাৰিছে।
তেওঁ সংবাদমাধ্যমক জানিবলৈ দি কয় যে আগশাৰীৰ ৰাজনৈতিক দলবোৰে ক্ষমতালৈ আহিবৰ বাবে বহু লোভনীয় প্ৰতিশ্ৰুতি দাঙি ধৰে। তাৰ পাছত ক্ষমতালৈ আহিলে মানুহক পাহৰি যায়। দুৰ্ভাগ্যজনকভাৱে ভোটাৰসকলে এনে প্ৰলোভনত ভোল যায়। তেওঁ এই সংস্কৃতিৰ বিৰুদ্ধে সকলোকে সচেতন কৰিব বিচাৰে।
সকলোলৈকে এইদৰে এক অবিনৱ বাৰ্তা প্ৰেৰণ কৰা সৰ্বাননৰ নিৰ্বাচনৰ প্ৰতীক চিহ্ন হৈছে ‘ডাষ্টবিন’।
