লোমহৰ্ষক আত্মহত্যাৰ ঘটনাই কঁপালে তামুলপুৰক; দাৰে কাটিলে নিজৰেই ডিঙি
বাক্সা জিলাৰ তামুলপুৰ মহকুমাৰ অধীনৰ কুমাৰীকাটা আৰক্ষী চকীৰ অন্তৰ্গত মেজগুৰী পুখুৰীপাৰ গাঁৱত আজি সংঘটিত এক লোমহৰ্ষক আত্মহত্যাৰ ঘটনাই সমগ্ৰ জিলাখনতে তীব্ৰ চাঞ্চল্যৰ সৃষ্টি হৈছে।
ঘটনাৰ বিৱৰণি মতে আজি পুৱা প্ৰায় দহ বজাত মেজগুৰী গাঁৱত ঘৰত কোনো নথকা অৱস্থাত লক্ষণ বৈশ্য (২৪) নামৰ এজন লোকে দাৰে নিজৰ ডিঙি কাটি আত্মহত্যা কৰে। পিছত তেজে তুমৰলি হৈ থকা তেওঁৰ শৰীৰ ঘৰৰ চোতালতে পৰি থাকে।
আনহাতে, লোকজনে আত্মহত্যাৰ পূৰ্বে নিজৰ অন্তসত্তা পত্নী মালতী বৈশ্য (২০)ক ডিঙি চেপি হত্যাৰ চেষ্টা চলাইছিল, অৱশ্যে মালতীয়ে কোনো মতে স্বামীৰ হাতৰ পৰা নিজক ৰক্ষা কৰিবলৈ সক্ষম হয়। জানিব পৰা মতে মাথোঁ ৫ মাহ আগতে মালতী বৈশ্যৰ সৈতে বিবাহপাশত আৱদ্ধ হৈছিল লক্ষণ।
পাৰিবাৰীক অশান্তিৰ বাবেই উক্ত ঘটনাটো সংঘটিত হোৱা বুলি স্থানীয় ৰাইজৰ সন্দেহ কৰিছে, ইফালে স্বামীৰ আত্মহত্যাৰ দৃশ্য দেখি মালতী বৈশ্য চোতালতে মূর্ছা যায়। স্থানীয় লোকে স্বামীৰ আক্ৰমণত গুৰুতৰভাৱে আহত মালতীক পিছত চিকিৎসালয়ত ভৰ্তি কৰোৱায়।
ঘটনা সন্দৰ্ভত স্থানীয় লোকে কুমাৰীকাটা আৰক্ষী চকীত খবৰ দিয়াত কুমাৰীকাটা আৰক্ষী চকীৰ ভাৰপ্ৰাপ্ত বিষয়া মুন্না পাঁচনীৰ নেতৃত্বত যোৱা এটি আৰক্ষীৰ দল ঘটনাস্থলীত উপস্থিত হৈ মৃতদেহটো উদ্ধাৰ কৰি কুমাৰীকাটা আৰক্ষী চকীলৈ লৈ আনে আৰু মৰোনত্তৰ পৰীক্ষাৰ ব্যৱস্থা কৰে।
বাতৰি লিখা পৰলৈকে আত্মহত্যাৰ প্ৰকৃত কাৰণ উদ্ধাৰ কৰিব পৰা নাই যদিও কি কাৰনত ঘটনাটো সংঘটিত হ’ল আৰক্ষীয়ে তাৰ অনুসন্ধান অব্যাহত ৰাখিছে।