প্ৰতীক হাজেলাক বদলি কৰা বাবে উচ্চতম ন্যায়ালয়ক সমালোচনা তৰুণ গগৈৰ
হাজেলাক এন আৰ চিৰ ৰাজ্যিক সমন্বয়কৰ পদৰ পৰা আঁতৰাই মধ্যপ্ৰদেশলৈ বদলি কৰা বাবে উচ্চতম ন্যায়ালয়ৰ বিৰুদ্ধে সৰৱ হৈ পৰিছে প্ৰাক্তন মুখ্য মন্ত্ৰী তৰুণ গগৈ।
আজি দিচপুৰৰ চৰকাৰী আৱাসত সংবাদমেল সম্বোধন কৰি হাজেলাৰ বদলিয়ে এন আৰ চি প্ৰক্ৰিয়াটোক দিশহীন আৰু মুৰব্বীহীন কৰি পেলাব বুলি মন্তব্য গগৈৰ।
“মই উচ্চতম ন্যায়ালয়ৰ গাতো দোষ দিম। বিকল্প ব্যৱস্থা এটা কৰি ল’ব লাগিছিল। কোনো বিকল্পৰ ব্যৱস্থা নকৰাকৈ কিয় এনে কৰিলে?” মন্তব্য গগৈৰ।
গগৈয়ে পূৰ্বে সংবাদ মাধ্যমৰ আগত হাজেলাক বদলি কৰা বাবে ভাল পাইছো বুলি মন্তব্য কৰিছিল।
আজি গগৈয়ে লগতে কয়, উচ্চতম ন্যায়ালয়ে বদলি কৰিব বিচাৰিলেও ৰাজ্য চৰকাৰে বদলিত বাধা দিব পাৰিলে হেঁতেন।
“চৰকাৰেও হাজেলাক ৰিলিজ কৰি দিব নালাগিছিল। ৰাজ্য চৰকাৰে ক’ব লাগিছিল- আন এটা বিকল্প নোহোৱাকৈ আমি এৰি নিদিওঁ।”
গগৈয়ে লগতে কয়, “এইখন চৰকাৰৰ আঁচনিহে, উচ্চতম ন্যায়ালয়ৰ আঁচনি নহয়। এইখন ভাৰত চৰকাৰৰ আঁচনি। অসম চৰকাৰে উদ্যোগ লৈছে। আমিহে হাজেলাৰ নাম ৰাজ্যিক সমন্বয়ক হিচাপে পঠিয়াইছিলো, তেওঁলোকে এপ্ৰ’ভহে কৰিছে। উচ্চতম ন্যায়ালয়ৰ মতে তেওঁ ৰাজ্যিক সমন্বয়ক হোৱা নাই। সেইকাৰণে কৈছো উচ্চতম ন্যায়ালয়ে কৰাটো ভুল হৈছে। ৰাজ্য চৰকাৰে উচ্চতম ন্যায়ালয়ত এফিডেফিট দিব লাগিছিল যে আমাক বিকল্প বিচাৰিবলৈ এমাহ বা কিবা এটা সময় দিয়ক। তেতিয়া উচ্চতম ন্যায়ালয়ে দিব, কিয় নিদিব?”
“এইটোও ঠিক, হাজেলা ৰাজ্যিক সমন্বয়কহে। হাজেলা মুৰব্বী নহয়। মুৰব্বী হৈছে ৰেজিট্ৰাৰ জেনেৰেল অব ইণ্ডিয়া। উচ্চতম ন্যায়ালয়কো মই ক’ম, তেওঁ হাজেলাক কিয় আগতে বাৰেপতি মাতি পঠিয়াইছিল? ৰেজিষ্টাৰ জেনেৰেলকহে মাতি পঠিয়াব লাগিছিল”, সংবাদমেলত গগৈৰ মন্তব্য।
হাজেলাৰ নিৰাপত্তালৈ অহা ভাবুকিৰ ক্ষেত্ৰত গগৈয়ে কয়, হাজেলাক নিৰাপত্তা দিব নোৱৰা চৰকাৰে পদত্যাগ কৰিব লাগে।
আনহাতে, সেই একেখন সংবাদমেলতে গগৈয়ে কেন্দ্ৰীয় চৰকাৰে ছাভাৰকাৰক ভাৰতৰত্ন দিব লাগে বুলি উত্থাপন কৰা প্ৰস্তাৱৰ সম্পূৰ্ণ বিৰোধিতা কৰে।
“তোমালোকে যদি সঁচাকৈয়ে মহাত্মা গান্ধীৰ প্ৰতি সন্মান জনোৱা, তেন্তে তোমালোকে মহাত্মা গান্ধীৰ হত্যাৰে অভিযুক্ত ছাভাৰকাৰক কিয় ভাৰত ৰত্ন দিবলৈ ওলাইছা”, গগৈৰ কটাক্ষ।
তেওঁ ছাভাৰকাৰৰ সলনি স্বাধীনতা সংগ্ৰামী তথা চহিদ কুশল কোঁৱৰকহে ভাৰতৰত্ন দিব লাগে বুলি কয়।