যোৱা ১৬ মাৰ্চত ৭৫ সংখ্যক জন্মদিন উদযাপন কৰিলে প্ৰখ্যাত বাংলা গায়ক কবীৰ সুমনে। জন্মদিনৰ দিনাই সুমনে নিজৰ যৌন জীৱনক লৈ আত্মগৌৰৱী এক মন্তব্য কৰিছিল। ৭৫ বছৰ বয়সতো বিছনাত পূৰ্বৰ দৰেই যৌন ক্ষমতা অটুট আছে বুলি উল্লেখ কৰিছিল সুমনে।
সুমনৰ এই মন্তব্যৰ পাছতে তেওঁক কঠোৰ সমালোচনা কৰিছে প্ৰখ্যাত লেখিকা তছলিমা নাছৰীনে। কিছু পুৰণি অভিযোগ উত্থাপন কৰিও তছলিমা নাছৰীনে কটাক্ষ কৰে সুমনক।
তছলিমাই কয়, “মই সুমনক ‘মুছলমান সুমন’ বুলি নকওঁ, সুমনক ‘হিপ’ক্ৰেটিক সুমন’ বুলি কওঁ। মই এই কথা বিশ্বাস নকৰো যে সুমনে আল্লাহ, ৰছুল নামাজ আৰু ৰোজাত বিশ্বাস কৰে। এই সুমনে স্বাৰ্থৰ বাবে যি বিচাৰে সেয়াই কৰিব পাৰে।”
“যদি সুমনে দেখে যে অঘৰী বা নাঙঠ সন্ন্যাসীৰ সাজ-পোছাক পৰিধান কৰিলে কিবা লাভ হ’ব পাৰে বা মানুহক মূৰ্খ সজাব পাৰি, তেতিয়া তেওঁ সেয়াও কৰিব।”– তছলিমাই লগতে কয়।
তছলিমাই লগতে চাবিনা ইয়াছমিনৰ সৈতে সুমনৰ সম্পৰ্কৰ বিষয়ে কিয় আলোচনা হোৱা নাই বুলিও প্ৰশ্ন তোলে। “সুমনৰ আদৰ্শ বোলা কিবা এটা কেতিয়াবা যে আছিল, মোৰ সন্দেহ আছে।”- সুমনক কটাক্ষ কৰি তছলিমাই লগতে কয়।
তছলিমা নাছৰীনে লগতে কবীৰ সুমনে ২০০৭ চনত তছলিমাৰ বিৰুদ্ধে বিদ্ৰোহ কৰা কলিকতাৰ ফতোৱাবাজ জেহাদীৰ পক্ষ লৈছিল বুলিও দাবী কৰে। তদুপৰি কবীৰ সুমনৰ ৰাজনৈতিক মতাদৰ্শৰ পৰিৱৰ্তনক লৈও বিদ্ৰুপ কৰে তছলিমাই।
তছলিমাই কয় যে সুমন এসময়ত বাওঁপন্থী আছিল। কিন্তু তেওঁ যদি সঁচা বাওঁপন্থী হ’লহেঁতেন, তেতিয়া ইমান সহজে তৃণমূলৰ সদস্য নহ’লহেঁতেন। “তেওঁৰ গাড়ী নাই। বহুতে এনে কথা কৈ নিজকে অতি সৎ মানুহ বুলি প্ৰমাণ কৰিব বিচাৰে। গাড়ী নথকাটো সততাৰ কোনো প্ৰমাণ নহয়” বুলিও সুমনক কটাক্ষ কৰে নাছৰীনে।
