তেজপুৰ হিমন্তক এৰি নিদিয়াৰ হুংকাৰ আৰ পি শৰ্মাৰ, “মই তেজপুৰৰ বাঘ, এখন হাবিত দুটা বাঘ নাথাকে”
বিতৰ্কিত মন্তব্য কৰি সংবাদ শিৰোনামাত থকা তেজপুৰৰ সাংসদ আৰ পি শৰ্মাই আগন্তুক লোকসভা নিৰ্বাচনত দলৰ প্ৰাৰ্থিত্ব সন্দৰ্ভত মন্তব্য কৰি পুনৰ চৰ্চালৈ আহিছে।
লোকসভা নিৰ্বাচনত তেজপুৰ সমষ্টিৰ পৰা তেওঁ দলৰ টিকত লাভ কৰিবলৈ সক্ষম হব নে নহয় বুলি সাংবাদিকে সোধা এটা প্ৰশ্নৰ উত্তৰ দিবলৈ গৈ আৰ পি শৰ্মাই ১০০ শতাংশই নিশ্চিত বুলি দাবী কৰে। ৩ ফেব্ৰুৱাৰিত ঢেকীয়াজুলিত এটা অনুষ্ঠানত অংশগ্ৰহণ কৰি এই মন্তব্য সাংসদ গৰাকীৰ।
আনহাতে, তেজপুৰ সমষ্টিৰ পৰা এইবাৰ বিজেপিৰ প্ৰভাৱশালী নেতা তথা বিত্ত মন্ত্ৰী হিমন্ত বিশ্ব শৰ্মাই টিকট লাভ কৰিব পাৰে বুলি ওলোৱা খবৰ সন্দৰ্ভত হিমন্তই তেজপুৰ সমষ্টিৰ পৰা টিকট নিবিচাৰে বুলি ডাঠি কয়। নিজকে তেজপুৰ সমষ্টিৰ বাঘ বুলি উল্লেখ কৰি কয়, “এখন হাবিত দুটা বাঘ থাকিব নোৱাৰে, মই তেজপুৰৰ বাঘ”।
ৰাজনৈতিক নেতাসকলৰ ভাষণৰ ফুলজাৰিৰ কোনো মুল্য নাই, সত্তৰ বছৰে দেশে এনে ভাষণৰ পৰা কোনোধৰণৰ সুফল নাপালে বুলি শৰ্মাই মন্তব্য কৰি নিজকে ৰাজনৈতিক নেতা নহয় এজন সংঘ পৰিয়ালৰ সদস্য আৰু অধিবক্তা হিচাপেহে চিনাকি দিবলৈ ভাল পায় বুলিও কয়।
উল্লেখযোগ্য যে, কেইদিনমান পূৰ্বে আৰ পি শৰ্মাই তেজপুৰত হিমন্ত বিশ্ব শৰ্মাৰ সৈতে এটা পথৰ আধাৰশিলা উন্মোচনী কাৰ্য্যসূচীত অংশ লৈ টিকট নাপালে পুনৰ ক’ৰ্টলৈ ওকালতিৰ বাবে যাম বুলি মন্তব্য কৰিছিল।