তেজপুৰৰ ৰাধিকাপুৰ বাকৰি গাঁৱত জে’লৰ পৰা পেৰলত অহা জিতেন নাথ নামৰ এজন যাৱজ্জীৱন কাৰাবন্দীয়ে পত্নীক নিশা হত্যাৰ চেষ্টা চলাই পিছত নিজকে হত্যা কৰাৰ এক চাঞ্চল্যকাৰী ঘটনা সংঘটিত হৈছে।
জানিব পৰা মতে শনিবাৰে নিশা পত্নী কল্পনা দেৱীক চোকা অস্ত্ৰৰে হত্যাৰ চেষ্টা চলায় যোৱা ২৮ আগষ্টত তেজপুৰ কেন্দ্ৰীয় কাৰাগাৰৰ পৰা ২০ দিনৰ পেৰলত অহা নাথে। স্বামীৰ আক্ৰমণত মহিলাগৰাকীৰ মৃত্যু নহ’ল যদিও যাৱজ্জীৱন কাৰাবন্দীজনে নিজেই ঘৰৰ কাষৰ গছ এজোপাত চিপ লৈ আত্মহত্যা কৰে।
মহিলাগৰাকীৰ চিঞৰ-বাখৰ শুনি চুবুৰীয়া লোক গোট খাই সংকটজনক অৱস্হাত কল্পনা দেৱীক তেজপুৰৰ কনকলতা অসামৰিক চিকিৎসালয়ত ভৰ্তি কৰোৱায় যদিও অত্যধিক ৰক্তক্ষৰণ হোৱাত উন্নত চিকিৎসাৰ বাবে নিশায়েই তেওঁক গুৱাহাটী চিকিৎসা মহাবিদ্যালয় হস্পিটেললৈ প্ৰেৰণ কৰা হয়৷
আনহাতে আত্মহত্যা কৰা নাথৰ মৃতদেহ কাৰ্য্যবাহী দণ্ডাধীশৰ উপস্হিতিত চমজি লৈ মৰণোত্তৰ পৰীক্ষাৰ বাবে প্ৰেৰণ কৰে বেবেজীয়া আৰক্ষীয়ে। ঘটনা সন্দৰ্ভত আৰক্ষীয়ে তদন্ত আৰম্ভ কৰিছে৷
২০০১ চনত সখীয়েক বিদুল দাসক হত্যা কৰি ২০০৩ চনৰ পৰা তেজপুৰ কেন্দ্ৰীয় কাৰাগাৰত যাৱজ্জীৱন কাৰাবন্দীৰূপে আছিল জিতেন নাথ।
