আঠ মাহ পূৰ্বে তেওঁ ৰাজনীতিত প্ৰৱেশৰ কথা ঘোষণা কৰিছিল। সমৰ্থকসকলৰ মাজত ‘থালাপতি বিজয়’ বুলি জনপ্ৰিয় তামিল অভিনেতা বিজয়ে দেওবাৰে নিজৰ নতুন দলৰ সমৰ্থনত প্ৰথমখন ৰেলী অনুষ্ঠিত কৰে। প্ৰথম জনসভাৰ পৰাই তেওঁ দলৰ লক্ষ্য আৰু ভৱিষ্যতৰ কাৰ্যপন্থাৰ বিষয়ে অৱগত কৰে। একে সময়তে ৰাজ্যৰ শাসকীয় দল ডিএমকেকো কটাক্ষ কৰে।
বিজয়ে নিজৰ দলৰ নাম ৰাখিছে ‘তামিলাগা ভেত্ৰী কাঝাগাম’ (টিভিকে)। দেওবাৰে তামিলনাডুৰ ভিল্লুপুৰম জিলাত টিভিকেৰ জনসভা অনুষ্ঠিত হয়। টিভিকেই দাবী কৰে যে ৰাজনীতিবিদ বিজয়ৰ ভাষণ শুনিবলৈ সভাস্থলীত লাখ লাখ লোক সমবেত হৈছিল। সমাৱেশৰ পৰা বিজয়ে কয় যে তেওঁৰ দলে দ্ৰাবিড় আন্দোলনৰ নেতা ৰামাস্বামী পেৰিয়াৰৰ আদৰ্শ অনুসৰণ কৰিব। লগতে সকলো মানুহৰ ৰাজনৈতিক বিশ্বাস মানি চলিব বুলিও কয়।
দলৰ ভৱিষ্যতৰ কাৰ্যপন্থা সন্দৰ্ভত বিজয়ে কয় যে তেওঁলোকে ৰাজ্যপালৰ পদ বিলুপ্ত কৰাটো বিচাৰে। ছোৱালীৰ বাবে সমান সুযোগ বিচাৰে। আদালতত তামিল ভাষাক কামকাজৰ ভাষা হিচাপে স্বীকৃতি দিব বিচাৰে। ইয়াৰ উপৰিও বিজয়ে কংগ্ৰেছকে ধৰি দেশৰ অন্যান্য বিৰোধী দলৰ লগত সুৰ মিলাই জাতি গণনাৰ দাবী উত্থাপন কৰে। প্ৰাথমিকভাৱে তামিল জাতীয়তাবাদৰ ওপৰত নিৰ্ভৰ কৰিয়েই বিজয়ৰ দলে নিৰ্বাচনী পথাৰত প্ৰৱেশ কৰিছে বুলি ধাৰণা কৰা হৈছে।
লগতে পঢ়কঃ হাস্যবদনে দীপাংকৰ বৰ্মনক গ্ৰেপ্তাৰ অসম আৰক্ষীৰ! অভিযুক্তৰ কান্ধত হাত থৈ ফটোৰ বাবে প’জ আৰক্ষীৰ
কাৰো নাম নোলোৱাকৈয়ে সমাৱেশত বিজয়ে কয় যে গোপন বুজাবুজিৰ জৰিয়তে এটা পৰিয়ালে লুণ্ঠন কৰিছে। ৰাজনৈতিক পৰ্যবেক্ষকৰ এটা অংশই বিশ্বাস কৰে যে বিজয়ৰ লক্ষ্য আছিল তামিলনাডুৰ মুখ্যমন্ত্ৰী আৰু কৰুণানিধিৰ পুত্ৰ এম কে ষ্টেলিনৰ পৰিয়াল।
অভিনেতাৰ পৰা ৰাজনীতিবিদত পৰিণত হোৱা বিজয়ে কটাক্ষ কৰি কয় যে একাংশ লোকে দ্ৰাবিড় মডেলৰ নামত মানুহক বিপথে পৰিচালিত কৰিছে। তামিলনাডুৰ উপ-মুখ্যমন্ত্ৰী তথা ষ্টেলিন-পুত্ৰ উদয়নিধিয়ে অৱশ্যে বিজয়ক ‘প্ৰিয় বন্ধু’ বুলি অভিহিত কৰি ভৱিষ্যতৰ বাবে শুভকামনা জনায়।
বিগত বৰ্ষৰ জুন মাহত প্ৰথম প্ৰকাশ পাইছিল যে বিজয়ে ৰাজনীতিত প্ৰৱেশ কৰিব পাৰে। চেন্নাইত ছাত্ৰ-ছাত্ৰীৰ পদযাত্ৰাত অংশগ্ৰহণ কৰে অভিনেতাগৰাকীয়ে। তাত নিৰ্বাচনৰ পূৰ্বে ৰাজনৈতিক নেতাৰ পৰা ধন গ্ৰহণ নকৰিবলৈ অভিভাৱকক পতিয়ন নিয়াবলৈ অভিনেতাগৰাকীয়ে ছাত্ৰ-ছাত্ৰীসকলক অনুৰোধ জনায়।
লগতে পঢ়কঃ ‘ব্যক্তিগতভাৱে সাক্ষাৎ কৰাৰ অৰ্থ আপোচ নহয়’ : বিতৰ্কৰ পিছত মুখ খুলিলে ডি ৱাই চন্দ্ৰচুড়ে
মনোৰঞ্জনৰ পৰা ৰাজনীতিলৈ যোৱাটো দক্ষিণ ভাৰতত নতুন কথা নহয়। এই ক্ষেত্ৰত দক্ষিণ ভাৰতকে অগ্ৰণী বুলি ক’ব পাৰি। বহু মনোৰঞ্জন জগতৰ তাৰকাই ৰাজনীতিত প্ৰৱেশ কৰিছে। ইয়াৰ শ্ৰেষ্ঠ উদাহৰণ আছিল এম জি ৰামচন্দ্ৰন, জয়ললিতা, বৈজয়ন্তীমালা, শিৱাজী গণেশন আদি। ইয়াৰ বাহিৰেও কমল হাছান, ‘কেপ্তেইন’ বিজয়কান্ত, সৰথকুমাৰৰ দৰে তাৰকাও আছে। এইবাৰ বিজয়ৰ নামো এই তালিকাত যোগ হ’ল।
